राम शिंदे सभापती होताच रोहित पवारांना मोठा धक्का!! कर्जत नगरपंचायतीत एकहाती सत्तेला सुरुंग, ८ नगरसेवक फुटले…
कर्जत : राष्ट्रवादी काँग्रेस पक्षाचे आमदार रोहित पवार यांना मोठा धक्का बसला आहे. कर्जत नगरपंचायतीतील राष्ट्रवादी काँग्रेस : शरदचंद्र पवार पक्षाचे ८ नगरसेवक आणि काँग्रेसच्या तिघा नगरसेवकांनी विधान परिषदेचे सभापती भाजप नेते राम शिंदे यांच्यासोबत रात्री गुप्त बैठक केली. यामुळे एकच खळबळ उडाली आहे.
या बैठकीत कर्जत नगरपंचायतीत लवकरच खांदेपालट होणार अशी चर्चा सुरु आहे. आमदार रोहित पवार यांच्यासाठी हा मोठा धक्का मानला जात आहे. कर्जत नगरपंचायतीमध्ये आमदार रोहित पवार यांनी एकहाती सत्ता मिळवत भाजपच्या राम शिंदे यांना धक्का दिला होता. कर्जत नगरपंचायतीमध्ये राष्ट्रवादी शरद पवार गटाचे १२ आणि काँग्रेसचे ३ असे महाविकास आघाडीचे एकूण १५ नगरसेवक आहेत.
भाजपला अवघ्या २ जागा मिळाल्या होत्या. आता मात्र राज्यात भाजपची सत्ता आल्याने त्यात राम शिंदे यांचा पराभव झाला तरी देखील त्यांना विधानपरिषदेवर घेऊन सभापती केल्याने चित्र बदलले आहे. अशातच अडीच वर्षांनंतर इच्छुकांमध्ये असंतोष उफाळून आला. नगराध्यक्षपदी शरद पवार गटाच्या उषा राऊत, तर काँग्रेसच्या रोहिणी घुले या उपनगराध्यक्ष होत्या.
त्यावेळी राज्यात महाविकास आघाडी सरकार असल्याने जनतेच्या आशा पल्लवित झाल्या होत्या. मात्र, एकाच कुटुंबाकडे पदे जात असल्याने नाराजी उफाळून आली. महायुती सरकार आल्याने पुन्हा राम शिंदे यांना साथ देऊन कामे मार्गी लावत विकास निधी मिळवायचा, असा निर्धार नगरसेवकांनी केला.
रामनवमीचे औचित्य साधत ११ नगरसेवकांनी भाजपला साथ देण्याचा निर्णय घेतल्याचे वृत्त आहे. यामुळे येणाऱ्या काळात नेमक्या काय घडामोडी घडणार याकडे सर्वांचे लक्ष लागले आहे. याबाबत आमदार रोहित पवार यांनी कोणतीही प्रतिक्रिया दिली नाही. याबाबत लवकरच ते कार्यकर्त्यांशी संवाद साधतील.
