पुरंदर विमानतळाच्या कामाला वेग!! आता सात गावातील २८३२ हेक्टर जमीन झाली राखीव, कोणत्या गावांचा समावेश? जाणून घ्या…
पुरंदर : गेल्या काही महिन्यांपासून येथील प्रस्तावित विमानतळासाठी ३३०० सर्वे क्रमांकातील सुमारे २८३२ हेक्टर जमीन राखीव करण्यात आली आहे. यामुळे कामाला गती मिळाली असून हे विमानतळ होणार की नाही याबाबत उलट सुलट चर्चा सुरू झाली होती. अखेर आता याबाबत प्रक्रिया सुरू झाली आहे. जमिनीसह रस्ते ,पानंद, ओढा, यासाठी त्याच्या सर्वे क्रमांकासह वेगळी माहिती देण्यात आली आहे.
पुरंदरचे विमानतळ हे आंतरराष्ट्रीय विमानतळ होणार असून पुण्यासह पश्चिम महाराष्ट्राचे ग्रोथ इंजिन म्हणून नावारूपाला येणार असल्याचे मुख्यमंत्री देवेंद्र फडणवीस यांनी जनतेला सांगितले आहे. असे असले तरी अर्थसंकल्पात त्यावर काहीच तरतूद दिसत नाही असे आमदार विजय शिवतारे यांनी निदर्शनास आणून दिले होते. यामुळे यावर प्रश्नचिन्ह उपस्थित करण्यात आले होते.
अर्थसंकल्पामध्ये पुरंदरला काहीच आर्थिक तरतूद नसल्याने सर्वत्र नाराजीचे वातावरण होते. परंतु आता विमानतळाच्या बाबतीत वेगाने हालचाली झाल्यामुळे पुरंदरला विमानतळ होणार हे नक्की झाले आहे. आता अधिसूचना काढून जागा राखीव करण्यात आली असून लवकरच मोबदला कशा पद्धतीने द्यायचा याबाबतची अंतिम अधिसूचना होण्याची शक्यता आहे.
पुरंदर तालुक्यातील वनपुरी, पारगाव मेमाणे, कुंभार वळण, इखतपूर, उदाची वाडी, मुंजवडी ,खानवडी या गावातील जमिनीचे सर्वे क्रमांक त्याच्या क्षेत्रफळासह औद्योगिक क्षेत्र म्हणून जाहीर करण्यात आले आहेत. महाराष्ट्र औद्योगिक विकास महामंडळाच्या अधिनियमानुसार हे क्षेत्र निश्चित करण्यात आले आहे. यामुळे याकडे सर्वांचे लक्ष लागले आहे.
दरम्यान, या सर्व सात गावाच्या गावाच्या चतु:सीमा निश्चित करण्यात आल्या आहेत. त्या लाल रंगाच्या रेषेने दाखवण्यात आल्याचे अधिसूचनेत म्हणले आहे. आता सात गावातील त्या जमिनीवर एमआयडीसीचे शेरे मारण्यात येतील. यामुळे पुढील कामाला देखील गती मिळणार आहे.
याबाबत पुरंदर तालुक्यातील सात गावातील महसूल अधिकारी, एमआयडीसी चे अधिकारी यांची लवकरच बैठक होऊन भूमिका निश्चित होईल. वनपुरी ३३९, कुंभारवळण. ३५१, उदाची वाडी २६१, इखतपूर २१७, मुंजवडी १४३, खानवडी ४८४, पारगाव १०३७ एकूण क्षेत्र. २८३२ हेक्टर भूसंपादन केले जाणार आहे.
