पुणेकरांनो, मेट्रोने प्रवास करण्याआधी ही बातमी वाचा! लक्ष्मीपूजनाला बदलणार वेळापत्रक
पुणे : दिवाळीच्या सणानिमित्त पुणे मेट्रोच्या वेळापत्रकात महत्त्वाचा बदल करण्यात आला आहे. लक्ष्मीपूजनाच्या दिवशी म्हणजेच रविवारी, ८ नोव्हेंबर रोजी मेट्रोची सेवा नेहमीपेक्षा लवकर बंद होणार आहे. यासंदर्भात महामेट्रो प्रशासनाकडून विशेष वेळापत्रक जाहीर करण्यात आले आहे. त्यामुळे रविवारी मेट्रोने प्रवास करण्याचा विचार करत असलेल्या प्रवाशांनी ही अपडेट जाणून घेणे महत्त्वाचे आहे.
महामेट्रोने दिलेल्या माहितीनुसार, रविवारी पुणे मेट्रोची सेवा सकाळी ६ वाजल्यापासून सुरू होणार असून रात्री ८ वाजेपर्यंतच उपलब्ध असेल. रात्री ८ नंतर मेट्रोची वाहतूक पूर्णपणे बंद ठेवण्यात येणार आहे. लक्ष्मीपूजनाच्या दिवशी रात्री प्रवाशांची संख्या कमी असते. तसेच मेट्रो कर्मचाऱ्यांनाही सण साजरा करता यावा, या उद्देशाने हा निर्णय घेण्यात आला आहे.
दरम्यान, सुरुवातीला रविवारी मेट्रोची सेवा सायंकाळी ६ वाजेपर्यंतच सुरू ठेवण्याचे नियोजन होते. मात्र, प्रवाशांची मागणी लक्षात घेऊन महामेट्रोने सेवेत आणखी दोन तासांची वाढ केली आहे. त्यामुळे आता पुणेकरांना रात्री ८ वाजेपर्यंत मेट्रोने प्रवास करता येणार आहे.
सोमवारपासून मेट्रोचे वेळापत्रक पूर्ववत
लक्ष्मीपूजनानिमित्त करण्यात आलेला हा बदल केवळ एका दिवसासाठी असणार आहे. सोमवार, ९ नोव्हेंबरपासून पुणे मेट्रोची सेवा पुन्हा नियमित वेळापत्रकानुसार सुरू होईल. त्यानुसार सकाळी ६ ते रात्री ११ वाजेपर्यंत मेट्रो धावणार आहे.
त्यामुळे लक्ष्मीपूजनाच्या दिवशी रात्री प्रवासाचे नियोजन करणाऱ्या पुणेकरांनी मेट्रोच्या बदललेल्या वेळापत्रकाची नोंद घ्यावी. ऐन सणासुदीच्या काळात प्रवास करताना गैरसोय होऊ नये, यासाठी प्रवाशांनी आपले नियोजन वेळेनुसार करावे, असे आवाहन महामेट्रो प्रशासनाकडून करण्यात आले आहे.
