Pune News : पत्नी सुंदर दिसत नाही, यामुळे तिचा सतत छळ, न्यायालयाने पतीला दिला दणका..
Pune News : पुणे शहरात महिला अत्याचाराच्या घटनांमध्ये अलीकडे वाढ होताना दिसत आहेत. बलात्कार, विनयभंग, छेडछाड अशा दिवसाला एक ते दोन घटना दररोज घडत आहेत. पत्नी चांगली, टापटीप राहत नाही, ती दिसायला सुंदर नाही, म्हणून सतत टोमणे मारून छळ करणाऱ्या एकाला तिला कौटुंबिक न्यायालयाने दणका दिला आहे. Pune News
पत्नीला दरमहा आठ हजार रुपये पोटगी देण्याचे आदेश न्यायालयाने दिले आहेत. कौटुंबिक न्यायालयात पत्नीने दाखल केलेल्या दाव्यावर न्यायालयाने त्वरित निर्णय दिला आहे.
तक्रारदार महिलेचा २०१८ मध्ये विवाह झाला होता. विवाहानंतर किरकोळ कारणावरुन पतीने तिच्याशी वाद घालण्यास सुरुवात केली. पत्नी चांगली राहत नाही, तसेच दिसायला सुंदर नसल्याचे सांगून तिला टोमणे मारण्यास सुरुवात केली.
पतीने तिच्या चारित्र्यावर संशय घेऊन छळ करण्यास सुरुवात केली. त्याच्या त्रासाला कंटाळून महिलेने ॲड. गायत्री कांबळे यांच्यामार्फत न्यायालयात दावा दाखल केला. महिला पतीवर अवलंबून होती. उदरनिवार्हाचे साधन नसल्याने तिला पोटगी मिळावी, असा अर्ज ॲड. कांबळे यांनी न्यायालयात सादर केला.
पती खासगी कंपनीत नोकरी करत असून, पत्नीकडे उदरनिर्वाहाचे अन्य कोणतेही साधन नसल्याने दरमहा २० हजार रुपये पोटगी देण्याची मागणी पत्नीने केली होती. पत्नी शिवणकाम, तसेच ब्युटीपार्लरचे काम करते. दरमहा मिळणाऱ्या वेतनातून आईचे उपचार केले जातात.
दरम्यान, घरखर्चाची जबाबदारी सांभाळावी लागते, असे पतीने न्यायालयात सांगितले होते. न्यायालयाने दोन्ही बाजूंच्या वकिलांनी केलेला युक्तीवाद ऐकून पत्नीला दरमहा आठ हजार रुपये पोटगी देण्याचे आदेश दिले.
