Pune Crime : चाकणमध्ये थरार! पूर्ववैमनस्यातून सराईत गुन्हेगारावर गोळीबार, पोलिसांनी एकला ठोकल्या बेडया…

Pune Crime : दिवसागणिक पुण्यातली गुन्हेगारी वाढते आहे असं म्हटलं तरी हरकत नाही. कोयता घेऊन रस्त्याने फिरणे, टोळा धाडी, गाड्या जाळणे एवढंच नाही तर शुल्लक रकमेसाठी हात तोडण्यासारख्या अंगावर काटा आणणारे प्रकार सध्या पुण्यात वेगात वाढले आहेत.

अशीच एक सध्या घटना समोर आली आहे. खुनातील आरोपींना मदत केल्याच्या रागातून एका सराईत गुन्हेगारावर गोळीबार केल्याची घटना सोमवारी (ता.१८) रात्री साडेदहा वाजण्याच्या सुमारास घडली. हा प्रकार रासे येथील मराठा हॉटेल येथे घडली.

याप्रकरणी स्वप्नील उर्फ सोप्या संजय शिंदे (रा. रासे) याने चाकण पोलीस ठाण्यात फिर्याद दिली आहे. फिर्यादी रेकॉर्डवरील गुन्हेगार असल्याची माहिती पोलिसांनी दिली आहे.

राहुल पवार (रा. महाळुंगे ता. खेड), अजय गायकवाड (रा. म्हाळुंगे ता. खेड) व इतर दोन अनोळखी तरुणांवर गुन्हा दाखल करुन अजय गायकवाड याला पोलिसांनी ताब्यात घेतले आहे. Pune Crime

पोलिसांनी दिलेल्या माहितीनुसार, चार महिन्यापूर्वी आरोपी राहुल पवार याचा लहान भाऊ रितेश पवार याचा खून झाला होता. खुनातील आरोपींना सोप्या शिंदे ह्याने मदत केल्याची माहिती आरोपींना मिळाली. याच रागातून आरोपी सोमवारी रात्री साडेदहा वाजण्याच्या सुमारास मराठा हॉटेलमध्ये आले.

त्यांनी खुनातील आरोपींना मदत व सहकार्य केल्याच्या रागातून सोप्या शिंदे याच्यावर दोन गोळ्या झाडल्या. या घटनेत फिर्यादी सोप्या शिंदे याच्या डोक्याला किरकोळ दुखापत झाली आहे.

दरम्यान, घटनेची माहिती मिळताच पोलिसांनी घटनास्थळी धाव घेऊन अजय गायकवाड याला ताब्यात घेतले. घटनेनंतर पसार झालेल्या आरोपींचा शोध घेण्यासाठी तपास पथके रवाना करण्यात आल्याची माहिती पोलिसांनी दिली आहे.