राजकारणात ‘सिक्रेट मुव्ह’चा स्फोट! देवगिरी बंगल्यावर मध्यरात्री बैठक; NCP कार्यकारिणीत मोठा फेरबदल ठरला? धनंजय मुंडेंना मिळणार थेट मोठी जबाबदारी!
मुंबई : राज्याच्या राजकारणात पुन्हा एकदा मोठी खळबळ उडवणारी माहिती समोर आली असून देवगिरी बंगल्यावर मध्यरात्री झालेल्या अत्यंत गोपनीय बैठकीनंतर राष्ट्रवादी काँग्रेस पक्षात (NCP) मोठ्या फेरबदलांचे संकेत मिळू लागले आहेत. ही बैठक पूर्णपणे सिक्रेट मोडमध्ये पार पडल्याचे सांगितले जात असून त्यानंतर पक्षाच्या राष्ट्रीय कार्यकारिणीबाबत मोठे निर्णय होण्याची चर्चा जोरात सुरू आहे.
सूत्रांच्या माहितीनुसार, या बैठकीत पक्ष संघटनेची नवी ब्लूप्रिंट, आगामी राजकीय रणनीती आणि कार्यकारिणीतील संभाव्य बदलांवर सखोल चर्चा झाली. उपमुख्यमंत्री सुनेत्रा पवार यांच्या उपस्थितीत पार पडलेल्या या बैठकीला खासदार पार्थ पवार यांच्यासह काही निवडक वरिष्ठ नेते उपस्थित असल्याची माहिती समोर येत आहे. मात्र या बैठकीबाबत पक्षाकडून कोणतीही अधिकृत पुष्टी करण्यात आलेली नाही.
गेल्या काही दिवसांपासून राष्ट्रीय कार्यकारिणीच्या यादीत काही बड्या नेत्यांची नावे गायब असल्याने आधीच अंतर्गत असंतोष आणि नाराजीच्या चर्चांना उधाण आले होते. त्यातच प्रफुल्ल पटेल आणि सुनिल तटकरे यांनी शरद पवार यांची घेतलेली भेट यामुळे या घडामोडींना आणखी वेग मिळाला आहे. त्यामुळे पक्षात मोठे राजकीय बदल निश्चित असल्याच्या चर्चांना अधिक बळ मिळत आहे.
मिळालेल्या माहितीनुसार, नव्या कार्यकारिणीत माजी मंत्री धनंजय मुंडे, मंत्री हसन मुश्रीफ आणि अनिल पाटील यांना अत्यंत महत्त्वाची संघटनात्मक जबाबदारी मिळण्याची शक्यता वर्तवली जात आहे. पक्षात नव्या चेहऱ्यांना पुढे आणण्याची आणि काही जुन्या पदाधिकाऱ्यांना बाजूला करण्याची रणनीती या बैठकीत ठरल्याचे सूत्रांचे म्हणणे आहे.
दरम्यान, या संभाव्य फेरबदलांमध्ये काही विद्यमान सदस्यांना डच्चू मिळण्याची शक्यता असून एका महिला लोकप्रतिनिधीचे नाव तसेच सुबोध मोहिते यांचे नाव कार्यकारिणीतून वगळण्याबाबत प्राथमिक चर्चा झाल्याची माहिती समोर आली आहे. मात्र यावर अद्याप कोणतीही अधिकृत घोषणा झालेली नाही.
राजकीय तज्ज्ञांचे मत आहे की ही संपूर्ण घडामोड म्हणजे आगामी निवडणुकांच्या पार्श्वभूमीवर मोठ्या राजकीय समीकरणांची नांदी ठरू शकते. सध्या तरी राज्याच्या राजकारणात एकच प्रश्न चर्चेत आहे—ही फक्त संघटनात्मक फेररचना आहे की मोठ्या राजकीय ‘गेमप्लॅन’ची सुरुवात?
