Onion : कांदा निर्यात बंदीचा शेतकऱ्यांना मोठा फटका, दरात झाली घसरण, शेतकरी अडचणीत…
Onion : केंद्र सरकारने कांद्याच्या निर्यातीवर बंदी घातल्याने घाऊक भावात सातत्याने घसरण होत आहे. त्यामुळे किरकोळ बाजारातही कांद्याचे भाव घसरले आहेत. तसेच गेल्या १५ दिवसांत कांद्याचे भाव क्विंटलमागे ११०० ते १२०० रुपयांपर्यंत घसरले आहेत.
डिसेंबरच्या पहिल्या आठवड्यात लाल कांद्याला सरासरी २७०० ते २८०० रुपये क्विंटल भाव होता. केंद्राने निर्यात बंदीचा निर्णय घेतला आणि तेव्हापासून बाजारात कांद्याचे भाव कोसळत आहेत. १००० ते १५०० रुपये दराने कांदा विकण्याची वेळ शेतकऱ्यांवर आली आहे.
तसेच १५ दिवसांत कांद्याचे दर निम्याहून अधिक कोसळल्याने शेतक-यांच्या आर्थिक अडचणीत कमालीची वाढ झाली आहे. मनमाड कृषि उत्पन्न बाजार समितीमध्ये लाल आणि पांढऱ्या कांद्याची २३४ नग इतकी आवक झाली. लाल कांद्याला ५०० ते १७११, सरासरी १५०० रुपये क्विंटल तर पांढऱ्या कांद्याला ४५२ ते ११००, सरासरी ९८० रुपये क्विंटल असा भाव होता. Onion
मक्याची ३२ नग आवक होऊन १९५१ ते २३११ सरासरी २०७५ रुपये प्रतिक्विंटल असे मक्याचे भाव होते. मका बाजारभाव सध्या स्थिर आहेत तर कांद्याचे भाव मात्र घसरणीला लागले आहेत. घाऊक बाजारात कांदा वधारल्याने शेतकऱ्याची आशा पल्लवित झाली होती.
पण निर्यातबंदी जाहीर झाली आणि कांद्याच्या भावाला ग्रहण लागले ते अद्यापपर्यंत कायम आहे. त्यानंतर सातत्याने कांद्याचे भाव गडगडत आहेत. लासलगाव बाजार समितीत आठ हजार १९२ क्विंटल लाल कांद्याची आवक झाली. त्याला सरासरी दीड हजार रुपये दर मिळाला.
आदल्या दिवशीच्या तुलनेत १०० रुपयांनी दर कमी झाले. अनेक बाजार समित्यांमध्ये उन्हाळ कांद्याची आवक जवळपास थांबली आहे. आता नवीन लाल कांदा बाजारात येत आहे. या कांद्याची साठवणूक करता येत नाही.
तो काढणीनंतर लवकर विक्रीस न्यावा लागतो. त्यामुळे दर घसरलेले असतानाही तो विकण्याशिवाय पर्याय नसल्याचे शेतकरी सांगत आहे. यामुळे शेतकऱ्यांना अडचणींना सामोरे जावे लागत आहे.
