उत्तर भारतात मुसळधार पावसाचा कहर सुरूच ; 24 तासांत 44 लोकांचा मृत्यू
नवी दिल्ली : उत्तर भारतातील सात राज्ये आणि केंद्रशासित प्रदेशांत मुसळधार पाऊसाने अक्षरशः हाहाकार उडविला आहे. राजधानी दिल्लीसह ७ राज्यांत मोठ्या प्रमाणात विध्वंस झाला आहे. हिमाचल, पंजाब, जम्मू आणि काश्मीर, उत्तराखंड, हरियाणा, राजस्थान आणि दिल्लीमध्ये सर्व प्रमुख नद्यांचा प्रवाह आहे. डोंगर कोसळत असून रस्ते, पूल वाहून जात आहेत.
सोमवारी गेल्या २४ तासांत विविध राज्यांमध्ये ४४ हून अधिक लोकांचा मृत्यू झाला आहे. हिमाचलमध्ये २० जणांचा मृत्यू झाला आहे. दुसरीकडे, उत्तर प्रदेशात पावसाशी संबंधित घटनांमध्ये आठ जणांचा मृत्यू झाला आहे. जम्मू-काश्मीर, हिमाचल आणि उत्तराखंडमध्ये राष्ट्रीय महामार्ग आणि राज्य महामार्गांसह ९०० हून अधिक रस्ते बंद आहेत. हजारो लोक रस्त्यावर अडकून पडले आहेत.
दिल्लीतही सोमवारी यमुनेने धोक्याचा टप्पा ओलांडला. सखल भाग रिकामा करण्यात येत आहे. पंतप्रधान नरेंद्र मोदी यांनी वरिष्ठ मंत्री आणि अधिकाऱ्यांसोबत बैठक घेऊन परिस्थितीचा आढावा घेतला. बाधितांच्या मदतीसाठी आवश्यक त्या सर्व उपाययोजना करण्याचे निर्देश त्यांनी दिले.
हिमाचलचे मुख्यमंत्री सुखविंदर सिंग सुखू आणि उत्तराखंडचे मुख्यमंत्री पुष्कर सिंग धामी यांच्याशी बोलून पंतप्रधानांनी सर्वतोपरी मदत करण्याचे आश्वासन दिलेदिली. दरम्यान, हिमाचलमध्ये मंगळवारपासून सुरू असलेल्या मुसळधार पावसापासून काहीसा दिलासा मिळण्याची शक्यता भारतीय हवामान खात्याने वर्तवली आहे.
एनडीआरएफच्या ३९ तुकड्या बाधित राज्यांमध्ये तैनात करण्यात आल्या आहेत. पंजाबमध्ये १४, हिमाचलमध्ये १२, उत्तराखंडमध्ये ८ आणि हरियाणामध्ये ५ संघ आहेत. त्याच वेळी, राजस्थानमध्ये, सिरोही, अजमेर, पाली आणि करौलीसह १४ जिल्ह्यांमध्ये गेल्या २४ तासात मुसळधार पाऊस झाला असून, माउंट अबूमध्ये सर्वाधिक २३१ मिमी पाऊस झाला आहे.
हिमाचलमध्ये आतापर्यंत ४ हजार कोटींचे नुकसान
हिमाचलमध्ये सलग तीन दिवस मुसळधार पावसाने कहर केला आहे. आतापर्यंत ५९ लोकांचा मृत्यू झाला असून ४ हजार कोटी रुपयांचे नुकसान झाल्याचा अंदाज आहे. कुल्लू-मनाली, मंडी आणि राज्याच्या वरच्या भागात हजारो लोक अडकले आहेत. बहुतांश जिल्ह्यांमध्ये वीज, फोन आणि इंटरनेट सेवाही ठप्प झाल्या आहेत.
कुल्लूमध्ये ढगफुटीमुळे १०० बिघा जमीन नाल्यात बदलली. मनालीमध्ये अनेक वाहने वाहून गेली. मंडीतील बियास नदीचा पूर वाढत आहे. ११३ घरे रिकामी करण्यात आली. सात राष्ट्रीय महामार्ग आणि ८२८ हून अधिक रस्ते अजूनही बंद आहेत. रेल्वे आणि विमान सेवा ठप्प झाली आहे. ४०३ बस विविध ठिकाणी अडकल्या आहेत.
हिमाचल उच्च न्यायालयासाठी सोमवार-मंगळवार सुट्टी जाहीर करण्यात आली आहे. डॉक्टर, परिचारिका आणि पॅरामेडिकल कर्मचाऱ्यांच्या सुट्या रद्द करण्यात आल्या आहेत. श्रीखंड महादेवाची पवित्र यात्राही पुढे ढकलण्यात आली आहे.
पंजाबमधील ५० गावे रिकामी, लष्कर तैनात
पंजाबमधील पूरस्थितीमुळे पाच जिल्ह्यातील ५० गावे रिकामी करण्यात आली आहेत. लोकांना गुरुद्वारांमध्ये ठेवण्यात आले आहे. जालंधरमधील फिल्लौर पोलीस अकादमीत सतलज नदीचे पाणी शिरले आहे. चंदीगडमध्ये तीन दिवसांत ४५० मिमी पाऊस झाला. मोहाली आणि पटियाला येथे लष्कर तैनात करण्यात आले आहे. फतेहगढ साहिबच्या महाविद्यालयात पाणी साचल्याने अनेक विद्यार्थी अडकले असून त्यांची सुखरूप सुटका करण्यात आली आहे.
एनडीआरएफचे पथक मदतकार्यात गुंतले आहेत. १७ गाड्या रद्द करण्यात आल्या. दिल्ली-चंदीगड राष्ट्रीय महामार्ग १ बंद करण्यात आला आहे. मुख्यमंत्री अरविंद केजरीवाल यांनी अधिकाऱ्यांना आवश्यक त्या उपाययोजना करण्याच्या सूचना दिल्या आहेत. मुसळधार पावसामुळे दिल्लीतील प्राथमिक शाळा मंगळवारी बंद राहणार आहेत. याशिवाय एमसीडीच्या सर्व शाळाही बंद राहतील.
उत्तराखंडमध्ये बद्रीनाथ महामार्गासह १०० हून अधिक रस्ते बंद पाऊस आणि भूस्खलनामुळे बंद आहेत. सर्व प्रमुख नद्यांना पूर आला आहे. हरिद्वारमध्ये गंगा धोक्याच्या चिन्हाजवळून वाहत आहे. हरियाणात विक्रमी पावसामुळे विध्वंस सलग तिसऱ्या दिवशी हरियाणातील जीटी पट्ट्यातील जिल्ह्यांमध्ये पावसाने सर्वाधिक नुकसान केले.
सहा जिल्ह्यांतील ६०० हून अधिक गावांमध्ये पावसाचे पाणी शिरले. पावसामुळे वेगवेगळ्या अपघातात नऊ जणांचा मृत्यू झाला. अंबाला जिल्ह्याला पाऊस आणि पुराचा सर्वाधिक फटका बसला आहे. तीन दिवसांत झालेल्या ४५१ मिमी पावसामुळे शहराचा ४० टक्के भाग पाण्याखाली गेला. अंबाला शहरात पाणी साचल्यानंतर लोकांना बाहेर काढण्यासाठी लष्कराचीही मदत घेण्यात आली.
