सोलापुरात मराठा आंदोलक आक्रमक! पडळकरांचा ताफा रोखला, आरक्षणावर भूमिका विचारताच म्हणाले…

सोलापूर : मराठा आरक्षणाच्या मागणीवरून राज्यातील वातावरण पुन्हा तापलं असताना सोलापूर-रत्नागिरी महामार्गावरील कामती येथे मराठा आंदोलकांनी भाजप आमदार गोपीचंद पडळकर यांचा ताफा अडवला. मनोज जरांगे पाटील यांच्या उपोषणाचा आज आठवा दिवस असल्याने आंदोलकांमध्येही मोठी अस्वस्थता आहे. याच पार्श्वभूमीवर पडळकरांचा ताफा अडवत आंदोलकांनी त्यांच्याकडून मराठा आरक्षणाबाबतची भूमिका स्पष्ट करून घेतली.

‘आरक्षणावर तुमची भूमिका काय?’ आंदोलकांचा थेट सवाल

कामती येथे पडळकरांचा ताफा अडवल्यानंतर मराठा आंदोलकांनी त्यांच्यासमोर आरक्षणाचा मुद्दा उपस्थित केला. मनोज जरांगे पाटील यांच्या उपोषणाला तुमचा पाठिंबा आहे का आणि मराठा समाजाच्या आरक्षणाबाबत तुमची नेमकी भूमिका काय, असा सवाल आंदोलकांनी केला.

या वेळी पडळकरांनी आपली भूमिका स्पष्ट करत मराठा समाजाच्या एसईबीसी आणि कुणबी आरक्षणाला आपण कायम पाठिंबा देत असल्याचं सांगितलं. मात्र, कागदपत्रांमध्ये खाडाखोड किंवा फेरफार करून तयार केलेले कुणबी दाखले रद्द झालेच पाहिजेत, असंही त्यांनी स्पष्ट केलं.

भूमिका स्पष्ट होताच आंदोलकांकडून स्वागत

पडळकरांनी मराठा समाजाच्या एसईबीसी आणि कुणबी आरक्षणाला समर्थन असल्याचं स्पष्ट केल्यानंतर आंदोलकांनी त्यांच्या भूमिकेचं स्वागत केलं. त्यामुळे सुरुवातीला ताफा अडवून निर्माण झालेल्या परिस्थितीला पडळकरांच्या स्पष्टीकरणानंतर वेगळं वळण मिळालं.

दरम्यान, मराठा आरक्षणाचा प्रश्न पुन्हा चिघळण्यामागे मनोज जरांगे पाटील यांचं सुरू असलेलं उपोषण महत्त्वाचं ठरत आहे. आज त्यांच्या उपोषणाचा आठवा दिवस असून प्रकृती खालावल्याची माहिती समोर आली आहे.

प्रसाद लाड भेटले, आश्वासनानंतर जरांगेंनी घेतलं होतं पाणी

दोन दिवसांपूर्वी भाजप आमदार प्रसाद लाड यांनी मनोज जरांगे पाटील यांची भेट घेतली होती. या भेटीत सरकारकडून काही आश्वासनं मिळाल्यानंतर जरांगे यांनी पाणी घेतलं होतं. मात्र, सरकारकडून अपेक्षित कार्यवाही होण्यासाठी त्यांनी दोन दिवसांची मुदत दिली होती.

ही मुदत संपल्यानंतरही मागण्यांबाबत ठोस निर्णय झालेला नसल्याने जरांगे यांनी पुन्हा पाणी आणि उपचार घेण्यास नकार देत उपोषण सुरूच ठेवण्याची भूमिका घेतली आहे.

आता सरकारच्या निर्णयाकडे लक्ष

एकीकडे जरांगे पाटील यांच्या उपोषणामुळे सरकारवर दबाव वाढत आहे, तर दुसरीकडे मराठा आंदोलकांकडून राजकीय नेत्यांना आरक्षणाबाबत थेट भूमिका स्पष्ट करण्यास भाग पाडलं जात आहे. कामती येथील पडळकरांच्या ताफा अडवण्याच्या घटनेनंतर त्यांची भूमिका समोर आली असली, तरी मराठा आरक्षणावर सरकार नेमका काय निर्णय घेणार आणि जरांगेंचं उपोषण कधी संपणार, याकडे आता संपूर्ण राज्याचं लक्ष लागलं आहे.