आजपासून देशभरात मोठे बदल लागू! गॅस सिलेंडर, रेल्वे, बँकिंगसह अनेक नियम बदलले; जाणून घ्या संपूर्ण माहिती

पुणे : ऑगस्ट महिन्याच्या पहिल्याच दिवशी सर्वसामान्यांसाठी अनेक महत्त्वाचे नियम बदलले आहेत. एलपीजी सिलिंडरच्या किमती, रेल्वेच्या तत्काळ तिकीट बुकिंगचे नियम, बँकिंग सेवा शुल्क, इलेक्ट्रॉनिक्स वस्तूंचे दर, एफएमसीजी उत्पादनांच्या किमती आणि विमान प्रवासाच्या खर्चात बदल करण्यात आले आहेत. या बदलांचा थेट परिणाम सर्वसामान्यांच्या मासिक बजेटवर होणार आहे.

1) व्यावसायिक LPG सिलिंडर स्वस्त

तेल कंपन्यांनी 19 किलोच्या व्यावसायिक एलपीजी सिलिंडरच्या किमतीत सुमारे 200 रुपयांची कपात केली आहे. त्यामुळे हॉटेल, रेस्टॉरंट, कॅटरिंग आणि इतर व्यावसायिकांना मोठा दिलासा मिळाला आहे. मात्र, 14.2 किलोच्या घरगुती गॅस सिलिंडरच्या दरात कोणताही बदल करण्यात आलेला नाही.

2) रेल्वेच्या तत्काळ तिकीट बुकिंगमध्ये बदल

भारतीय रेल्वेने तत्काळ तिकीट बुकिंग प्रक्रिया अधिक सुलभ केली आहे. टोकन वाटप आणि बुकिंगची वेळ एकसमान करण्यात आल्याने प्रवाशांना दोनदा रांगेत उभे राहण्याची गरज राहणार नाही. यामुळे तिकीट आरक्षणाची प्रक्रिया अधिक जलद होणार आहे.

3) बँकांच्या सेवा शुल्कात बदल

1 ऑगस्टपासून काही बँकांनी विविध सेवांच्या शुल्कात बदल केला आहे. उज्जीवन स्मॉल फायनान्स बँक आता एसएमएस अलर्टसाठी प्रति संदेश 30 पैसे आकारणार आहे. तसेच डेबिट कार्ड देखभाल शुल्क, खाते व्यवस्थापन शुल्क आणि इतर काही बँकिंग सेवांच्या शुल्कातही बदल करण्यात आले आहेत.

4) दैनंदिन वापराच्या वस्तू महागण्याची शक्यता

सणासुदीचा हंगाम लक्षात घेता चहापत्ती, साबण, हेअर ऑईल आणि इतर एफएमसीजी वस्तूंच्या किमती 6 ते 8 टक्क्यांनी वाढू शकतात. त्यामुळे घरगुती खर्च वाढण्याची शक्यता आहे.

5) इलेक्ट्रॉनिक्स आणि स्मार्टफोन महागू शकतात

उत्पादन खर्च आणि मेमरी चिपच्या वाढलेल्या किमतीमुळे टीव्ही, फ्रिज, वॉशिंग मशीन यांसारख्या इलेक्ट्रॉनिक्स वस्तू 4 ते 6 टक्क्यांनी महाग होण्याची शक्यता आहे. याचबरोबर स्मार्टफोनच्या किमतीतही वाढ होण्याची शक्यता व्यक्त करण्यात आली आहे.

6) विमान प्रवासाच्या खर्चावर परिणाम

प्रत्येक महिन्याच्या सुरुवातीला एअर टर्बाइन फ्युएल चे दर बदलले जातात. इंधनाचे दर कमी झाल्यास हवाई प्रवास स्वस्त होऊ शकतो, तर दर वाढल्यास विमान तिकिटांच्या किमती वाढण्याची शक्यता आहे.

सर्वसामान्यांनी काय करावे?

एलपीजीचे नवे दर, बँक शुल्क, रेल्वेचे नियम आणि दैनंदिन वापराच्या वस्तूंच्या किमतीत झालेल्या बदलांची माहिती वेळोवेळी तपासणे गरजेचे आहे. या बदलांचा थेट परिणाम प्रत्येक कुटुंबाच्या मासिक खर्चावर होणार असल्याने आर्थिक नियोजन करताना या नव्या नियमांचा विचार करणे आवश्यक ठरणार आहे.