Junnar News : बिबट्याच्या हल्ल्यात चार वर्षांच्या शिवांशचा दुर्दैवी मृत्यू, विरह सहन न झाल्याने आईने उचललं धक्कादायक पाऊल..
Junnar News जुन्नर : आळे गावातील तितर मळ्यातील अमोल भुजबळ यांच्या घरातील अंगणात खेळत असलेल्या शिवांश भुजबळ या चार वर्षाच्या बालकावर ऊसाच्या शेतात दबा धरुन बसलेल्या बिबट्याने हल्ला केला. या हल्ल्यात जखमी झालेल्या शिवांशचा रुग्णालयात उपचार सुरु असताना मृत्यू झाला. या घटनेने परिसरातून मोठी हळहळ व्यक्त होत आहे. Junnar News
दरम्यान, विरह सहन न झाल्याने त्याच्या आईने देखील आत्महत्या करण्याचा प्रयत्न केल्याची माहिती समोर आली आहे. शिल्पा भुजबळ असे आत्महत्येचा प्रयत्न करणाऱ्या आईचे नाव आहे.
बिबट्याची वाढती संख्या आणि दहशतीविरोधात संताप व्यक्त करत या महिलेने आक्रोश केला. लवकरात लवकर वनविभागाने बिबट्याला जेरबंद करावे, अशी मागणी सुद्धा या महिलेने केली आहे.
काय घडले होते ?
शिवांश हा त्याच्या आजोबांसोबत घराच्या अंगणात खेळत होता. त्यावेळी घरासमोरील ऊसाच्या शेतात दबा धरुन बसलेल्या बिबट्याने अचानक झडप घालून शिवांशची मान पकडून त्याला नेऊ लागला. लागलीच परिसरात आरडोओरडा झाला.
त्यावेळी या ठिकाणी असलेल्या अविनाश गडगे या तरूणाने मोठ्या हिमतीने बिबट्याच्या मागे पळत जाऊन शिवांशला बिबट्याच्या जबड्यातून सोडवले. त्यावेळी गंभीर जखमी अवस्थेत असलेल्या शिवांशला घरच्यांनी तातडीने खासगी रुग्णालयात दाखल केले. मात्र, तेथे उपचारा दरम्यान शिवांशचा मृत्यू झाला.
दरम्यान, दुसरीकडे शिवांशच्या मृत्युने त्याची आई शिल्पा यांना जबर धक्का बसला. आपल्या पोटच्या गोळ्याच्या मृत्युचा धक्का सहन न झाल्याने आईने आत्महत्येचा प्रयत्न केला. या घटनेनं परिसरातून मोठी हळहळ व्यक्त होत असून वनविभागाच्या कारभारविरोधात संतापाची लाट उसळली आहे.दरम्यान,
शिवांशच्या मृत्युनंतर आळे गावातील ग्रामस्थांमध्ये संतापाची लाट उसळली. वनविभागाने या बिबट्याचा तातडीने बंदोबस्त करावा अन्यथा आंदोलन करू, असा इशारा ग्रामस्थांनी दिला.
