पुणेकरांसाठी महत्वाची बातमी! वाहतूक नियमांमध्ये मोठे बदल, ‘ड्रिंक अँड ड्राईव्ह’साठी १००० नाही, तर भरावा लागणार ‘इतक्या रुपयांचा दंड..
पुणे : पुण्यात दिवसेंदिवस ट्रॅफिक ची समस्या वाढताना दिसत आहे. त्यासोबतच नियम मोडणाऱ्यांची संख्या देखील अधिक आहे. अशातच आता पुण्यातील वाढत्या वाहतूक समस्यांमुळे वाहतूक पोलिसांनी नियम अधिक कठोर केले आहेत.
नवीन नियमांनुसार, वाहतूक नियमांचे उल्लंघन केल्यास दहापट दंड आकारण्यात येणार असून काही गुन्ह्यांसाठी तुरुंगवासाची शिक्षा देखील लागू करण्यात आली आहे. वाहनचालकांनी मद्यप्राशन करून गाडी चालवल्यास यापूर्वी १,००० रुपये दंड होता. मात्र आता हा दंड १०,००० रुपये इतका वाढवण्यात आला आहे.
तसेच यासोबतच ६ महिन्यांपर्यंतच्या तुरुंगवासाची शक्यता आहे. सीटबेल्ट न घालता वाहन चालवणे आणि दुचाकीवर ट्रिपल सीट प्रवास केल्यास यापूर्वी १०० रुपये दंड होता. परंतु, आता १,००० रुपये दंड आकारला जाणार आहे. हेल्मेटशिवाय दुचाकी चालवल्यास १,००० रुपये दंड किंवा तीन महिन्यांसाठी परवाना निलंबित करण्यात येईल.
दरम्यान, यापूर्वी विमा नसलेल्या वाहनांसाठी २०० ते ४०० रुपये दंड आकारला जात होता. मात्र, आता पहिल्यांदा २,००० रुपये आणि दुसऱ्यांदा ४,००० रुपये दंड आकारला जाईल. तसेच ३ महिन्यांपर्यंत तुरुंगवासाची शक्यता आहे.
सिग्नल तोडणे, अतिवेगाने वाहन चालवणे, परवाना नसताना गाडी चालवणे आणि वाहन चालवताना मोबाईलचा वापर केल्यास ५,००० रुपये दंड आकारला जाणार आहे. यापूर्वी हा दंड फक्त ५०० रुपये होता.
जर एखाद्या अल्पवयीन मुलाने वाहन चालवले तर त्याच्या पालकांना २५,००० रुपये दंड भरावा लागेल. तसेच 3 वर्षांसाठी तुरुंगवासाची शिक्षा आणि १ वर्षासाठी वाहन नोंदणी रद्द केली जाऊ शकते.
