पुण्यात पुन्हा गँगवॉरचा भडका! आता गुन्हेगारांची खैर नाही, पुणे पोलिसांनी उचललं मोठं पाऊल,..
पुणे : पुणे शहरात सध्या गुंडगिरी, टोळीयुद्ध आणि गुन्हेगारीच्या घटनांमध्ये मोठी वाढ झाली आहे. बंडू आंदेकर आणि निलेश घायवळ टोळीने पुण्यात दहशत माजवली असताना आता पुणे पोलिसांनी मोठी कारवाई करण्यास सुरूवात केली आहे.
शहरातील वाहनांची तोडफोड, कोयत्याचा वापर करून होणारे हल्ले आणि घरफोडीच्या वाढत्या घटनांमुळे नागरिक भयभीत झाले आहेत. या गंभीर परिस्थितीची दखल घेत पुणे पोलीस आयुक्त अमितेश कुमार यांनी गुन्हेगारांवर अंकुश ठेवण्यासाठी कठोर पावले उचलण्याचे आदेश दिले आहेत.
पुणे पोलीस आयुक्त अमितेश कुमार यांनी शहरभर नाकाबंदी आणि कोम्बिंग ऑपरेशन प्रभावीपणे राबवण्याचे निर्देश दिले आहेत. या विशेष मोहिमेत गुन्हे शाखा, वाहतूक विभाग, राज्य राखीव पोलीस बल आणि पोलीस मुख्यालयातील विशेष पथके सहभागी होणार आहेत.
शहरातील गुंड टोळ्यांकडून चोरीच्या वाहनांचा वापर मोठ्या प्रमाणात होत असल्याने, अशा संशयास्पद वाहनांची कसून तपासणी करण्याचे आदेशही देण्यात आले आहेत. विशेषतः, अवैध शस्त्रे बाळगणाऱ्यांवर कठोर कारवाई करण्याचे निर्देश आयुक्तांनी दिले आहेत.
गुन्हेगारांचा सामना करण्यासाठी पोलीस दलाला अधिक सक्षम केले जात आहे. कोम्बिंग ऑपरेशन आणि नाकाबंदीदरम्यान पोलीस अधिकारी आणि अंमलदार 9-एमएम कार्बाईन आणि पिस्तूलसारखी शस्त्रे सोबत बाळगतील.
शहराच्या प्रत्येक भागात शस्त्रसज्ज पोलीस तैनात असतील, जेणेकरून गुन्हेगारांवर वचक बसेल. रात्री उशिरापर्यंत सुरू असलेल्या पब आणि बारवरही आता पोलिसांची नजर असणार आहे. शासनाने ठरवून दिलेल्या वेळेनंतरही सुरू असणाऱ्या अशा ठिकाणांच्या चालक आणि मालकांवर कायदेशीर कारवाई केली जाणार आहे.
