आंब्याच्या बॅगपासून सोन्याच्या साडीपर्यंत… ईशा अंबानीच्या लूकमध्ये दडलंय असं काय, ज्याने मेट गालात सगळ्यांचंच लक्ष वेधलं?
न्यूयॉर्क: न्यूयॉर्कमध्ये पार पडलेल्या मेट गाला २०२६ सोहळ्यात यंदा भारतीय फॅशनचा ठसा उमटवणारा सर्वात चर्चेचा क्षण ठरला तो ईशा अंबानी हिचा भव्य लूक. जगभरातील नामांकित सेलिब्रिटींच्या उपस्थितीत इशाने साडीच्या माध्यमातून भारतीय परंपरा, शाही वारसा आणि आधुनिकतेचा अप्रतिम संगम सादर केला.
इशाने परिधान केलेली सोन्याच्या धाग्यांनी विणलेली साडी प्रसिद्ध फॅशन डिझायनर गौरव गुप्ता यांनी खास तयार केली होती. या साडीत पारंपरिक हस्तकला, पिछवाई चित्रशैलीची प्रेरणा आणि आधुनिक डिझाइनचा सुंदर मिलाफ पाहायला मिळाला. तब्बल ५० कारागिरांनी सुमारे १२०० तास मेहनत घेऊन ही साडी साकारली होती, ज्यातून भारतीय कारागिरीची उत्कृष्टता दिसून आली.
या लूकला अधिक उठाव देण्यासाठी प्रसिद्ध स्टायलिस्ट अनाइता श्रॉफ अदजानिया यांनी खास शैली दिली. इशाचा ब्लाऊज हा पारंपरिक कापडाचा नसून मौल्यवान दागिन्यांपासून तयार करण्यात आला होता. विशेष म्हणजे, या ब्लाऊजमध्ये तिच्या आई नीता अंबानी यांच्या दागिन्यांच्या संग्रहातील ऐतिहासिक दागिन्यांचा वापर करण्यात आला होता, ज्यामुळे लूकला शाही वारशाची झलक मिळाली.
साडीसोबत परिधान केलेले जड नेकलेस, झुमके आणि बांगड्या यांनी तिच्या व्यक्तिमत्त्वाला अधिकच उठाव दिला. तसेच सोनेरी केप आणि आधुनिक पद्धतीने केलेली साडी नेसण्याची शैली यामुळे तिचा लूक अधिक आकर्षक झाला.
मात्र, सर्वाधिक लक्ष वेधून घेतले ते तिच्या हातातील आंब्याच्या आकाराच्या बॅगने. भारतीय संस्कृतीत आंबा समृद्धी आणि गोडव्याचे प्रतीक मानला जातो. या छोट्याशा घटकामुळे तिचा लूक केवळ फॅशनपुरता मर्यादित न राहता एक प्रभावी सांस्कृतिक संदेश देणारा ठरला.
एकूणच, ईशा अंबानी हिने सादर केलेला हा लूक भारतीय परंपरेचा अभिमान जागतिक स्तरावर पोहोचवणारा ठरला असून, फॅशन विश्वात त्याची जोरदार चर्चा सुरू आहे.
