साडेपाच वर्षांचं प्रेम अन् लग्न ठरताच भयंकर शेवट! तरुणीला ५०० फूट खोल दरीत ढकललं; प्रियकराचा बनाव पोलिसांनी उघड केला
गारगोटी, कोल्हापूर : साडेपाच वर्षांपासून सुरू असलेल्या प्रेमसंबंधांचा शेवट एका भयंकर घटनेत झाल्याने भुदरगड तालुक्यात खळबळ उडाली आहे. दुसऱ्या तरुणाशी विवाह ठरल्यानंतर प्रेमसंबंध संपवण्याची भूमिका घेतल्याच्या रागातून प्रियकराने तरुणीला खोल दरीत ढकलल्याचा आरोप आहे. तरन्नुम बशीर नाईक (वय २३) असं मृत तरुणीचं नाव असून, श्रीपाद दिनकर वडर (वय २५) असं आरोपीचं नाव आहे. ही घटना शिवडाव-नाईकवाडी परिसरातील नाईकवाडी धबधब्याजवळ घडली. भुदरगड पोलिसांनी आरोपीला अटक केली असून, तपास सुरू आहे.
लग्न ठरलं, प्रेमसंबंध तोडण्यावरून वाद
पोलिसांकडून मिळालेल्या माहितीनुसार, तरन्नुम आणि श्रीपाद यांचे गेल्या साडेपाच वर्षांपासून प्रेमसंबंध होते. दोघांची ओळख गारगोटीतील शिवाजीनगर परिसरात झाली होती. तरन्नुम महागाव येथील अभियांत्रिकी महाविद्यालयात शिक्षण घेत होती. तिचं दुसऱ्या तरुणाशी लग्न ठरलं होतं. त्यामुळे यापुढे प्रेमसंबंध सुरू ठेवता येणार नसल्याचं तिने श्रीपादला सांगितल्याची माहिती आहे.
९ ऑक्टोबर रोजी श्रीपाद तिला फिरायला जाण्याच्या बहाण्याने नाईकवाडी धबधब्याजवळ घेऊन गेला. तेथे विवाह आणि प्रेमसंबंधांच्या मुद्द्यावरून दोघांमध्ये वाद झाला. त्यानंतर संतापाच्या भरात त्याने तरन्नुमला सुमारे ५०० फूट खोल दरीत ढकलल्याचा आरोप आहे. या घटनेत तिचा मृत्यू झाला.
सुरुवातीला बेपत्ता असल्याचा बनाव?
तरन्नुम शुक्रवारी अचानक बेपत्ता झाल्यानंतर तिच्या कुटुंबीयांनी आणि पोलिसांनी शोध सुरू केला. आरोपी श्रीपाद स्वतःहून भुदरगड पोलीस ठाण्यात हजर झाला. सुरुवातीला तरन्नुम बेपत्ता असल्याचा बनाव केल्याची माहिती वृत्तांत देण्यात आली आहे. पोलिसांनी चौकशी केल्यानंतर त्याने अपहरण आणि हत्येची कबुली दिल्याचं सांगण्यात आलं आहे. त्यानंतर त्याला अटक करण्यात आली.
चार तासांची शोधमोहीम; आंबोलीच्या पथकाची मदत
खोल दरी आणि दुर्गम भूभागामुळे तरुणीचा शोध घेणं कठीण झालं. शुक्रवारी रात्रीपासून शनिवारी पहाटेपर्यंत शोध घेऊनही यश न मिळाल्याने आंबोली येथील विशेष बचाव पथकाला पाचारण करण्यात आलं. शनिवारी सकाळी सुमारे ११ वाजता पोलिस आणि बचाव पथकाने संयुक्त शोधमोहीम सुरू केली. सुमारे चार तासांच्या प्रयत्नांनंतर तरन्नुमचा मृतदेह दरीतून बाहेर काढण्यात आला. घटनास्थळाची न्यायवैद्यक पथकाने पाहणी केली असून, मृतदेह शवविच्छेदनासाठी कोल्हापूरच्या सीपीआर रुग्णालयात पाठवण्यात आला.
तरन्नुमच्या पश्चात आई-वडील आणि एक भाऊ असा परिवार आहे. विवाह ठरल्याच्या कारणावरून घडलेल्या या घटनेमुळे गारगोटीसह संपूर्ण भुदरगड तालुक्यात शोक आणि संताप व्यक्त होत आहे. या प्रकरणाचा पुढील तपास भुदरगड पोलीस करत आहेत.
