वंदे मातरमवरून स्वातंत्र्यदिनी राजकीय स्फोट! सोनिया गांधींवर फडणवीसांचा थेट हल्ला; ‘मानसिक नक्षलवाद’ म्हणत काँग्रेसला घेरलं

मुंबई : स्वातंत्र्य दिनाच्या निमित्ताने देशभरात राष्ट्रभक्तीचा उत्साह असताना ‘वंदे मातरम’ गीतावरून मोठा राजकीय वाद निर्माण झाला आहे. काँग्रेस मुख्यालयात झालेल्या स्वातंत्र्य दिन कार्यक्रमात वंदे मातरम पूर्ण सादर होऊ न दिल्याचा आरोप भाजपकडून करण्यात आला आहे. या आरोपांमुळे दिल्लीपासून महाराष्ट्रापर्यंत राजकीय चर्चा रंगल्या असून मुख्यमंत्री देवेंद्र फडणवीस यांनी या प्रकरणावरून काँग्रेस आणि सोनिया गांधी यांच्यावर जोरदार हल्लाबोल केला आहे.

मुख्यमंत्री फडणवीस यांनी या वादावर प्रतिक्रिया देताना अत्यंत कठोर शब्दांचा वापर केला. “देशातून बंदुकीच्या जोरावर चालणारा नक्षलवाद संपुष्टात येत असला, तरी विचारांच्या माध्यमातून पसरवला जाणारा मानसिक नक्षलवाद अधिक धोकादायक आहे,” असे ते म्हणाले. स्वातंत्र्य दिनासारख्या राष्ट्रीय कार्यक्रमात वंदे मातरमला विरोध होणे किंवा त्याबाबत नाराजी व्यक्त होणे ही देशाच्या भावना दुखावणारी बाब असल्याचे त्यांनी म्हटले.

फडणवीसांच्या या वक्तव्यामुळे राजकीय वातावरण अधिक तापले आहे. त्यांनी अप्रत्यक्षपणे सोनिया गांधींवर निशाणा साधत, “राष्ट्रीय प्रतीकांबाबत नकारात्मक भूमिका घेणे म्हणजे संविधानाच्या भावनेलाच आव्हान देणे आहे,” असा आरोप केला. वंदे मातरम हे केवळ गीत नसून स्वातंत्र्यलढ्याचे प्रतीक असल्याचेही त्यांनी अधोरेखित केले.

दुसरीकडे काँग्रेसने भाजपचे सर्व आरोप फेटाळून लावत, हा मुद्दा जाणीवपूर्वक राजकीय रंग देण्यासाठी उचलला जात असल्याचा दावा केला आहे. मात्र भाजप नेते आणि महायुतीतील अनेक पदाधिकाऱ्यांनी काँग्रेसवर राष्ट्रभावनेचा अपमान केल्याचा आरोप करत टीकेची झोड उठवली आहे.

याच पत्रकार परिषदेत फडणवीसांनी महिला आरक्षणाच्या मुद्यावरही विरोधकांना लक्ष्य केले. महिला आरक्षणाला पाठिंबा असल्याचे सांगणाऱ्या पक्षांनी संसदेत आवश्यक बहुमतासाठी सहकार्य करावे, असे आवाहन त्यांनी केले. 2023 मध्ये मंजूर झालेल्या महिला आरक्षण विधेयकातील जनगणना आणि मतदारसंघ पुनर्रचना या अटी पूर्ण होणे आवश्यक असल्याचे त्यांनी स्पष्ट केले.

“महिलांच्या नावाने राजकारण करण्यापेक्षा विधेयक मंजुरीसाठी ठोस भूमिका घ्या. खायचे दात वेगळे आणि दाखवायचे दात वेगळे अशी भूमिका विरोधकांनी घेऊ नये,” असा टोला फडणवीसांनी लगावला.

दरम्यान, वंदे मातरम वादामुळे स्वातंत्र्य दिनानंतरही राष्ट्रीय राजकारणात नवा संघर्ष पेटण्याची चिन्हे दिसत आहेत. काँग्रेस आणि भाजप यांच्यातील आरोप-प्रत्यारोपांमुळे हा मुद्दा आगामी काळात आणखी गाजण्याची शक्यता व्यक्त केली जात आहे.