क्लास वन अधिकाऱ्याकडून पत्नीचा शारीरिक छळ, जादूटोणा केला, पिस्तुल काढला अन्…
नांदेड : गडचिरोली जिल्ह्यातील धानोऱ्यात कार्यरत असणाऱ्या तहसीलदाराला नांदेड पोलिसांनी अटक केल्याची धक्कादायक घटना समोर आली आहे. या घटनेने एकच खळबळ उडाली आहे. अविनाश शेंबटवाड असे आरोपी तहसीलदाराचे नाव असून याबाबत धक्कादायक माहिती समोर आली आहे. पत्नीला त्रास देत असल्याचा आरोप त्यांच्यावर आहे.
मूलबाळ होत नसल्यामुळे पत्नीला मारहाण करून तिच्यावरतीच पिस्तूल रोखणाऱ्या असून सध्या ते कोठडीत आहेत. अविनाश शेंबटवाड हे मूळचे नांदेड जिल्ह्यातील रहिवासी आहेत. दीड वर्षांपूर्वी अविनाश यांचे लग्न झाले. मात्र, दीड वर्षानंतरही मुळबळ होत नसल्यामुळे ते पत्नीचा सतत छळ करत असल्याचे तक्रारीत म्हटले आहे.
तसेच जादूटोण्याचा प्रयत्नही केल्याचा आरोप पत्नीने केला आहे. लग्नामध्ये मुलीच्या घरच्यांकडून सर्वांना मानपान, सोने व अन्य साहित्य देखील दिलं होतं. लग्नानंतर तहसीलदार पती अविनाश यांच्यासह कुटुंबीयांनी त्यांना शारीरिक त्रास देण्यास सुरूवात केली. मारहाण, त्याचबरोबर जीवे मारण्याच्या उद्देशाने त्यांच्यावरती पिस्तूलही रोखल्याची देखील माहिती आहे.
याबाबत कौटुंबिक छळाचा गुन्हा दाखल केला आहे. अविनाश शेंबटवाड हे नांदेडमध्ये असल्याची माहिती मिळताच शिवाजीनगर पोलिसांनी त्यांना अटक केली आहे. त्यांना न्यायालयात हजर केल्यानंतर त्यांची रवानगी न्यायालयीन कोठडीत करण्यात आली आहे. याबाबत पोलीस तपास करत असून या घटनेने सगळेच हादरले आहेत.
सासरी मारहाण, पतीचा त्रास वाढल्याने अविनाश शेंबटवाड यांची पत्नी नांदेडला माहेरी गेली होती. सासरी असताना मूलबाळ होण्यासाठी जादूटोण्याचा प्रयत्न केल्याचाही आरोप तिने केला आहे. कौटुंबिक छळासह अनिष्ठ, अघोरी प्रथा व जादूटोणाविरोधी कायद्यानुसार गुन्हा नोंदविण्यात आला आहे. याबाबत तपास सुरु आहे.
