LPG ग्राहकांना मोठा झटका! 30 दिवसांचा अल्टिमेटम; ‘हे’ न केल्यास सिलिंडर पुरवठा बंद होणार
मुंबई : देशात जून महिन्याच्या पहिल्याच दिवशी LPG सिलिंडर वापरासंदर्भात मोठा आणि महत्त्वाचा बदल लागू करण्यात आला आहे. सरकारने स्पष्ट केले आहे की ज्या ग्राहकांकडे PNG (पाइप्ड नॅचरल गॅस) आणि LPG दोन्ही कनेक्शन आहेत, त्यांनी आता 30 दिवसांच्या आत LPG कनेक्शन परत करणे बंधनकारक आहे. अन्यथा संबंधित गॅस कनेक्शन रद्द करण्याची कारवाई केली जाऊ शकते.
पश्चिम आशियातील तणाव, आंतरराष्ट्रीय गॅस पुरवठ्यावर निर्माण झालेला दबाव आणि ऊर्जा संकटाची शक्यता लक्षात घेऊन सरकारने हा निर्णय घेतला आहे. घरगुती गॅस पुरवठा अधिक स्थिर, सुरक्षित आणि प्रभावी ठेवणे हा या निर्णयामागचा मुख्य उद्देश असल्याचे सांगण्यात आले आहे.
देशभरात PNG जोडण्यांचा विस्तार वेगाने सुरू असला तरी LPG सिलिंडरचा वापर अद्याप कमी झालेला नाही. अनेक ग्राहक दोन्ही सुविधा एकाच वेळी वापरत असल्याचे सरकारच्या निदर्शनास आले आहे. त्यामुळे गॅस वितरण व्यवस्थेवर अतिरिक्त ताण निर्माण होत असल्याचे स्पष्ट करण्यात आले आहे.
या पार्श्वभूमीवर पेट्रोलियम आणि नैसर्गिक वायू मंत्रालयाने LPG नियमन आदेशात सुधारणा केली आहे. नवीन नियमांनुसार, ज्या भागांमध्ये PNG सेवा उपलब्ध आहे, त्या ठिकाणच्या ग्राहकांनी 30 दिवसांच्या आत LPG सिलिंडर परत करणे आवश्यक आहे. ही मुदत पूर्ण न केल्यास संबंधित LPG कनेक्शन बंद केले जाऊ शकते.
सरकारच्या माहितीनुसार, मार्च 2026 पर्यंत देशात सुमारे 6,50,000 नवीन PNG जोडण्या देण्यात आल्या आहेत. तरीही अनेक कुटुंबांनी LPG वापर थांबवलेला नाही. यामुळे सरकारच्या नियमांचे उल्लंघन होत असल्याचेही स्पष्ट करण्यात आले आहे.
नव्या आदेशानुसार ड्युअल कनेक्शन (LPG + PNG) हळूहळू बंद करण्याची प्रक्रिया सुरू करण्यात आली आहे. ऊर्जा वितरण अधिक नियोजनबद्ध करण्यासाठी हा निर्णय महत्त्वाचा मानला जात आहे.
दरम्यान, आंतरराष्ट्रीय बाजारात तेल आणि गॅस दरांमध्ये चढ-उतार सुरू आहेत. अमेरिका-इराण तणाव, क्रूड ऑईलचे वाढते दर आणि पुरवठा साखळीतील अनिश्चितता यामुळे ऊर्जा बाजारावर परिणाम होत आहे. त्यामुळे सरकारकडून आधीच नियोजनबद्ध पावले उचलली जात आहेत.
ग्राहकांनी वेळेत नियमांचे पालन करावे, अन्यथा पुढील काळात LPG पुरवठ्यावर परिणाम होण्याची शक्यता नाकारता येत नाही, असा इशाराही प्रशासनाकडून देण्यात आला आहे.
