भर बाजारपेठेत ‘दादागिरी’चा थरार! आमदार किरण लहामटेंच्या स्वीय सहाय्यकावर तरुणाला मारहाणीचा आरोप, सीसीटीव्ही व्हिडीओ व्हायरल
अकोले : अहिल्यानगर जिल्ह्यातील अकोले तालुक्यात एका मारहाणीच्या घटनेने राजकीय वातावरण तापले आहे. राष्ट्रवादी काँग्रेस अजित पवार गटाचे आमदार डॉ. किरण लहामटे यांचे स्वीय सहाय्यक आणि चुलत भाऊ मुकुंद लहामटे यांच्यावर एका तरुणाला भर बाजारपेठेत मारहाण केल्याचा आरोप करण्यात आला आहे. राजूर येथील बाजारपेठेत घडलेली ही घटना सीसीटीव्ही कॅमेऱ्यात कैद झाली असून, त्याचा व्हिडीओ सोशल मीडियावर मोठ्या प्रमाणात व्हायरल झाला आहे.
मिळालेल्या माहितीनुसार, ६ जुलै रोजी राजूर बाजारपेठ परिसरात हा प्रकार घडला. एका किरकोळ कारणावरून मुकुंद लहामटे आणि संबंधित तरुणामध्ये वाद झाला. सुरुवातीला शाब्दिक वाद झाल्यानंतर परिस्थिती अचानक चिघळली आणि आरोपानुसार मुकुंद लहामटे यांनी तरुणाला रस्त्यावरच मारहाण केली. भर बाजारात झालेल्या या प्रकारामुळे व्यापारी, नागरिक आणि परिसरातील उपस्थित लोकांमध्ये काही काळ गोंधळाचे वातावरण निर्माण झाले.
व्हायरल झालेल्या सीसीटीव्ही फुटेजमध्ये एका व्यक्तीकडून तरुणाला मारहाण होत असल्याचे दिसत आहे. मात्र, या व्हिडीओची अधिकृत पुष्टी अद्याप झालेली नाही. पोलिसांकडून घटनेची सत्यता तपासली जात असून, फुटेज आणि संबंधित व्यक्तींचे जबाब यावरून पुढील कारवाई केली जाणार आहे.
या घटनेनंतर नागरिकांमध्ये संतापाची भावना व्यक्त होत आहे. राजकीय नेत्यांशी संबंधित व्यक्तींवर आरोप झाल्यानंतर पोलिसांनी निष्पक्ष तपास करून योग्य कारवाई करावी, अशी मागणी स्थानिकांकडून केली जात आहे. विशेष म्हणजे घटना घडून काही दिवस उलटले असतानाही अद्याप राजूर पोलीस ठाण्यात गुन्हा दाखल झालेला नसल्याची माहिती समोर आली आहे. त्यामुळे पोलिसांच्या भूमिकेवरही प्रश्न उपस्थित होत आहेत.
दरम्यान, आमदार किरण लहामटे सध्या पावसाळी अधिवेशनासाठी मुंबईत असल्याचे सांगण्यात येत आहे. या प्रकरणावर त्यांच्याकडून किंवा त्यांच्या कार्यालयाकडून अद्याप कोणतीही अधिकृत प्रतिक्रिया देण्यात आलेली नाही.
या घटनेमुळे सत्ताधारी पक्षातील नेत्यांच्या जवळच्या व्यक्तींवर होणाऱ्या आरोपांचा मुद्दा पुन्हा चर्चेत आला आहे. विरोधकांकडूनही या प्रकरणावरून सरकारवर निशाणा साधला जाण्याची शक्यता आहे. आता पोलिस तपासात नेमके काय निष्पन्न होते आणि संबंधितांवर कोणती कारवाई होते, याकडे सर्वांचे लक्ष लागले आहे.
