माळेगावच्या चेअरमनपदी अजित पवार तर व्हा. चेअरमनपदी संगीता कोकरे यांची निवड….
बारामती : येथील माळेगाव सहकारी साखर कारखान्याच्या चेअरमनपदी राज्याचे उपमुख्यमंत्री अजित पवार यांची निवड करण्यात आली. तसेच व्हा. चेअरमनपदी संगीता बाळासाहेब कोकरे यांची निवड आज झालेल्या संचालक मंडळाच्या बैठकीत एक मुखाने करण्यात आली. माळेगाव सहकारी साखर कारखान्याची निवडणूक प्रक्रिया सुरू झाल्यापासून या निवडणुकीकडे राज्याचे लक्ष लागले होते.
याचे कारण म्हणजे राज्याचे उपमुख्यमंत्री अजितदादा पवार हे देखील या निवडणुकीच्या रिंगणात उभे होते. ब वर्ग गटातून त्यांनी आपली उमेदवारी जाहीर करत आपणच कारखान्याचे चेअरमन होणार असल्याचे देखील या आधीच सांगितले होते. या निवडणुकीत अजित पवार यांच्या पॅनलला 21 पैकी 20 जागा मिळाल्या तर विरोधी तावरे गटाला केवळ एक जागा मिळाली.
असे असताना मात्र ही निवडणूक मोठी चुरशीची झाली या निवडणुकीत अजित पवार यांनी आपली ताकद पणाला लावली होती. तब्बल दहा-बारा दिवस ते बारामती तळ ठोकून होते. दरम्यान आज झालेल्या निवडीकडे सभासदांचे लक्ष लागले होते चेअरमनपदी अजित पवार यांची निवड होणार हे निश्चित होते.
असे असताना मात्र व्हाईस चेअरमन कोण होणार याबाबत सर्वांना उत्सुकता होती. या पदासाठी अनेकजण इच्छुक होते. अनेकांनी अजित पवार यांच्याकडे फिल्डिंग लावली होती. अखेर संगीता कोकरे यांची बिनविरोध निवड करण्यात आली अजित पवार यांनी राज्यात सर्वाधिक उसाचा दर माळेगाव सहकारी साखर कारखाना देईल असे या आधीच शेतकऱ्यांना सांगितले आहे.
आता येणाऱ्या काळात शेतकऱ्यांना किती दर मिळणार हे लवकरच समजेल. अजित पवार या निवडणुकीत उतरणार असे जाहीर केल्याने ही निवडणूक चांगलीच गाजली. तसेच यामुळे त्यांच्यावर टीका देखील करण्यात आली होती. विरोधकांनी देखील त्यांना जोडणे टक्कर दिली. मात्र त्यांचा पॅनल विजयी झाला.
