Ajit Pawar : प्राचीन आणि आधुनिकतेचा संगम साधून छत्रपती संभाजी महाराज यांचे बलिदान स्थळ उभारावे – अजित पवार

Ajit Pawar  पुणे : श्री क्षेत्र तुळापूर येथील स्वराज्य रक्षक धर्मवीर छत्रपती संभाजी महाराज यांचे बलिदान स्थळ प्राचीन आणि आधुनिकतेचा संगम साधून महाराजांचा गौरवशाली इतिहास जगासमोर येईल तसेच जगाला हेवा वाटेल अशा स्वरूपात उभारण्यात यावे, असे निर्देश उपमुख्यमंत्री अजित पवार यांनी दिले आहेत .

स्वराज्य रक्षक धर्मवीर छत्रपती संभाजी महाराज यांचे तुळापूर (ता. हवेली) येथील बलिदान स्थळ विकास कामांची त्यांनी पाहणी केली. याप्रसंगी आमदार ज्ञानेश्वर कटके, प्रभारी जिल्हाधिकारी तथा जिल्हा परिषदेचे मुख्य कार्यकारी अधिकारी संतोष पाटील, सार्वजनिक बांधकाम विभागाचे मुख्य अभियंता अतुल चव्हाण, अधीक्षक अभियंता बाप्पा बहीर, कार्यकारी अभियंता अमोल पवार, तुळापूरच्या सरपंच ॲड. गुंफा इंगळे, वढू बुद्रुकच्या सरपंच अंजली शिंदे आदी उपस्थित होते.

पवार म्हणाले, छत्रपती संभाजी महाराज यांचे बलिदान स्थळ विकासकामे करताना ऐतिहासिक दृश्यस्वरुपातील आणि दर्जेदार साहित्याचा वापर करावा. विकासकामे गुणवत्तापूर्ण, दर्जेदार, टिकाऊ आणि वेळेत पूर्ण होतील, याकडे लक्ष द्यावे. कोणतीही कामे प्रलंबित राहणार नाहीत, याबाबत दक्षता घ्यावी. विकासकामे करताना दगडी कातीव, कोरीव बांधकाम, मातीच्या वैविध्यपूर्ण विटा आदींचा वापर करत बांधकामाला मजबुती येईल अशा पद्धतींचा अवलंब करावा. Ajit Pawar

स्वराज्य रक्षक छत्रपती संभाजी महाराज यांचे बलिदान स्थळ व समाधी स्थळ स्मारक वढू (बु.) विकास आराखडा अंतर्गत दुसऱ्या टप्प्यातील एकूण २६४ कोटी रुपयाच्या कामाबाबत सादर करण्यात आलेल्या प्रस्तावास शासनस्तरावर बैठक घेऊन त्वरित मंजूरी देण्यात येईल. या कामांचे सविस्तर आराखडे व अंदाजपत्रक तयार करुन निविदा काढण्याची कार्यवाही करावी.

नदीच्या कडेला बांधकाम करताना नदीच्या नैसर्गिक प्रवाहाला कोणताही बाधा येणार नाही यासाठी सर्व पर्यावरणाच्या नियमांचे पालन करावे; तसेच नदीच्या अनुषंगाने लाल रेषा, निळी रेषाबाबतच्या अटींचे काटेकोर पालन करावे. परिसरात अधिकाधिक वृक्षारोपण करावे, अशा सूचना उपमुख्यमंत्री पवार यांनी दिल्या. यावेळी पवार यांनी छत्रपती संभाजी महाराज समाधीस्थळ वढू बु. (ता. शिरुर) स्मारक विकास आराखड्याबाबत माहिती घेतली तसेच अधिकाऱ्यांना सूचना केल्या.

मुख्य अभियंता चव्हाण, अधीक्षक अभियंता बहीर आणि कार्यकारी अभियंता पवार यांनी सुरु असलेल्या विकासकामांबाबत माहिती दिली.

ठेकेदाराला झाप झाप झापले…

शिरुर-हवेलीचे आमदार ज्ञानेश्वर कटके यांनी छत्रपती संभाजी महाराज समाधीस्थळाचे काम संथ गतीने सुरू असल्याचा नुकत्याच हिवाळी अधिवेशनात औचित्याचा मुद्दा उपस्थित केला होता. त्यानंतर या मुद्दावर अजित पवार यांनी मी स्वतः हा या कामाला भेट देण्यासाठी येणार असल्याचे सांगितले होते. त्यानुसार दादा आले आणि चालू कामाची संथगतीची परिस्थिती पहाता त्यांनी ठेकेदाराला झाप झाप झापले आणि काम नसेल होत तर सोडून दे असा सज्जड दम भरला.