२१-० च्या निकालानंतर शरद पवार गटाची नवी खेळी? सुनेत्रा पवारांना थेट निरोप, अजितदादांचं स्वप्न पूर्ण करण्यासाठी एकत्र येण्याचं आवाहन!
बारामती : सोमेश्वर सहकारी साखर कारखान्याच्या निवडणुकीत सुनेत्रा पवार यांच्या पॅनलने २१ पैकी २१ जागा जिंकत एकतर्फी विजय मिळवला. या निकालात शरद पवार यांचं मार्गदर्शन लाभलेल्या युगेंद्र पवार यांच्या पॅनलला पराभवाचा सामना करावा लागला. बारामतीतील या प्रतिष्ठेच्या लढतीनंतर आता दोन्ही राष्ट्रवादी काँग्रेस पुन्हा एकत्र येणार का, असा प्रश्न उपस्थित झाला आहे. शरदचंद्र पवार राष्ट्रवादी काँग्रेसचे प्रदेशाध्यक्ष शशिकांत शिंदे यांनी सुनेत्रा पवार यांच्या नेतृत्वाखालील राष्ट्रवादी काँग्रेसला थेट एकत्र येण्याचं आवाहन केलं आहे. त्यामुळे राजकीय वर्तुळात नव्या चर्चांना सुरुवात झाली आहे.
‘अजितदादांचं स्वप्न पूर्ण करायचं असेल तर आमच्यासोबत या’
शशिकांत शिंदे यांनी म्हटलं, “अजित पवारांचं स्वप्न जर पूर्ण करायचं असेल, तर पवारसाहेबांनी सांगितल्याप्रमाणे अजितदादांच्या पक्षाने आमच्यासोबत यावं.” यावेळी त्यांनी अजित पवार यांच्या कुटुंबाबाबतही भूमिका स्पष्ट केली. “अजितदादांच्या कुटुंबावर आम्ही कधी टीका केली नाही. त्यांच्या कुटुंबाला अपमानास्पद वाटेल असं आम्ही काही केलं नाही,” असं शिंदे म्हणाले. त्यांच्या या विधानामुळे दोन्ही पक्षांतील दुरावा कमी होणार का, याकडे लक्ष लागलं आहे. मात्र, विलीनीकरणाबाबत कोणताही अधिकृत निर्णय जाहीर झालेला नाही.
शरद पवारांची भूमिका वेगळी होती; आता चर्चांना पुन्हा हवा
काही दिवसांपूर्वी शरद पवार यांनी दोन्ही राष्ट्रवादींच्या एकत्रीकरणाबाबत भूमिका मांडताना, आम्ही कुणासोबतही जाणार नाही; एकत्र यायचं असेल तर त्यांनी आमच्यासोबत यावं, असं म्हटलं होतं. त्यामुळे विलीनीकरणाच्या चर्चांना पूर्णविराम मिळाल्याचं मानलं जात होतं. आता शशिकांत शिंदे यांनी केलेल्या आवाहनामुळे या विषयावर पुन्हा चर्चा सुरू झाली आहे. मात्र, हे आवाहन म्हणजे पक्षाच्या अधिकृत विलीनीकरणाचा निर्णय आहे, असं म्हणता येणार नाही.
सोमेश्वरमध्ये पवार विरुद्ध पवार; सुनेत्रा पवारांचं निर्विवाद वर्चस्व
बारामतीतील सोमेश्वर सहकारी साखर कारखान्याची निवडणूक दोन्ही राष्ट्रवादी काँग्रेससाठी प्रतिष्ठेची ठरली. सुनेत्रा पवार आणि युगेंद्र पवार यांच्या नेतृत्वाखालील पॅनलमध्ये थेट लढत झाली. युगेंद्र पवार यांच्या पॅनलकडे शरद पवार गटाचं पॅनल म्हणून पाहिलं जात होतं. मात्र, सुनेत्रा पवार यांच्या पॅनलने सर्व २१ जागा जिंकल्या. त्यामुळे या निकालाला बारामतीतील राजकीय ताकदीच्या दृष्टीने महत्त्व प्राप्त झालं आहे.
तीन वर्षांपूर्वीची फूट; विलीनीकरणाचा निर्णय कधी?
सुमारे तीन वर्षांपूर्वी राष्ट्रवादी काँग्रेसमध्ये फूट पडून दोन गट निर्माण झाले. अजित पवार यांच्या नेतृत्वाखालील गट भाजपसोबत सत्तेत सहभागी झाला, तर शरद पवार यांच्या नेतृत्वाखालील गट विरोधी पक्षात राहिला. अजित पवार हयात असताना दोन्ही गटांच्या विलीनीकरणाबाबत चर्चा झाल्याचे दावे करण्यात आले होते. त्यांच्या निधनानंतरही या विषयावर विविध वक्तव्यं झाली. शरद पवार यांचा गट भाजपप्रणीत राष्ट्रीय लोकशाही आघाडीत सहभागी होणार असल्याची चर्चाही काही महिन्यांपूर्वी रंगली होती; मात्र ती प्रत्यक्षात आली नाही. आता सोमेश्वरच्या निकालानंतर आलेल्या या आवाहनामुळे दोन्ही राष्ट्रवादींच्या भविष्यातील राजकीय वाटचालीबाबत उत्सुकता वाढली आहे.
