पोलीस दलात खळबळ! गुन्हे शाखेतील पोलिसावर बलात्काराचा गुन्हा दाखल..!!
पुणे : पुणे शहर पोलिस दलाच्या गुन्हे शाखेतीलएका पोलिसावर बलात्काराचा गुन्हा दाखल करण्यात आला आहे. यामुळे एकच खळबळ उडाली आहे. तसेच त्या पोलिसासह दुसर्‍या एका पोलिसावर, महिलेवर आणि दोन अनोळखी व्यक्तींवर विविध कलमान्वये गुन्हा दाखल करण्यात आला आहे.
याप्रकरणी एका २४ वर्षीय पिडीतेने तक्रार दिली आहे.याप्रकरणी मुंढवा पोलीस स्टेशनमध्ये गुन्हा दाखल आहे. ही घटना बी. टी. कवडे रोडवरील श्रीनाथ कॉम्प्लेक्स आणि आंबेडकर चौकातील डायमंड क्वीन हॉटेल समोर घडली आहे.
पोलीस अंमलदार कादीर कलंदर शेख आणि पोलीस अंमलदार समीर पटेल, २ अनोळखी व्यक्ती व एका अनोळखी महिलेविरूद्ध भादंवि कलम ४२०, ३७६, ३९२, ३२३, ५०४, ५०६, ३४ तसेच अनुसूचित जाती/जमाती (अत्याचार प्रतिबंधक) अधिनियम सन १९८९ चे कलम ३ (१) (१२) अन्वये गुन्हा दाखल करण्यात आला आहे. संबंधित गुन्हा सुमारे ३ वर्षांपूर्वीपासून ते १ जुलै २०२३ दरम्यान घडला आहे. हा गुन्हा मुंढवा पोलीस स्टेशनमध्ये दाखल करण्यात आला आहे.
मिळलेल्या माहिती नुसार, पिडीत महिला या अनुसूचित जातीतील आहेत. त्याबाबत आरोपी कादीर कलंदर शेखला माहित असताना देखील त्याने त्यांना लग्नाचे आमिष दाखवून वेळोवेळी त्यांच्याशी शारीरिक संबंध ठेवले. वेळावेळी आळंदी येथे जावून लग्न करण्याचे बहाणे केले. प्रत्येक वेळी काही ना काही कारण देवून लग्न करण्यास टाळाटाळ केली.
लग्नाबाबत विचारणा केल्यानंतर कादीर कलंदर शेखने पिडीत महिलेला शिवीगाळ करून मारहाण केली. दि.१ जून २०२३ रोजी रात्री साडेदहा वाजण्याच्या दरम्यान आंबेडकर चौकातील हॉटेल डायमंड क्वीन येथे आरोपी कादीर शेख, समीर पटेल आणि इतरांनी पिडीत महिलेला मारहाण केली. कादीर शेखने त्यांचा मोबाईल हिसकावून नेला आहे.
दरम्यान, या प्रकारानंतर संतप्त महिलेने पोलीस ठाण्यात या घटनेची माहिती दिली. या गुन्हयाचा पुढील तपास हडपसर विभागाच्या सहाय्यक पोलीस आयुक्त अश्विनी राख करीत आहेत.
