वाढदिवस साजरा केला, शुभेच्छांचे स्टेटस ठेवले; पण काही तासांतच ‘भावपूर्ण श्रद्धांजली’… ऊसाच्या ट्रेलरने तरुणाचा जीव घेतला

दौंड : दौंड तालुक्यातून काळजाला चटका लावणारी घटना समोर आली आहे. १९ वर्षीय आर्यन वासुदेव ससाणे याने एक दिवस आधीच आपला वाढदिवस आनंदात साजरा केला. मात्र, वाढदिवसाच्या दुसऱ्याच दिवशी त्याच्यावर काळाने घाला घातला. पारगाव-नानगाव अष्टविनायक महामार्गावर ऊस वाहतूक करणाऱ्या ट्रॅक्टर-ट्रेलरला धडकून आर्यनचा अपघाती मृत्यू झाला.

या घटनेने आर्यनच्या कुटुंबीयांवर आणि मित्रपरिवारावर दुःखाचा डोंगर कोसळला आहे. नानगाव परिसरातही या घटनेनंतर हळहळ व्यक्त केली जात आहे.

ऊस वाहतूक करणाऱ्या ट्रेलरला धडक

पारगाव-नानगाव अष्टविनायक महामार्गावर सध्या ऊस वाहतूक करणाऱ्या ट्रॅक्टर-ट्रेलरची संख्या मोठ्या प्रमाणात वाढली आहे. याच मार्गावर ऊस वाहतूक करणारा एक ट्रॅक्टर-ट्रेलर रस्त्यावर थांबलेला होता.

दरम्यान, आर्यनची या ट्रॅक्टर-ट्रेलरला जोरदार धडक झाली. अपघातात तो गंभीर जखमी झाला. त्याला तातडीने उपचारासाठी जवळच्या खासगी रुग्णालयात दाखल करण्यात आले. मात्र, उपचार सुरू असतानाच त्याचा मृत्यू झाला.

वाढदिवसाचे स्टेटस ठेवणाऱ्या मित्रांवर श्रद्धांजली वाहण्याची वेळ

आर्यनने वाढदिवस साजरा केल्यानंतर त्याच्या मित्रांनी सोशल मीडियावर वाढदिवसाच्या शुभेच्छांचे स्टेटस ठेवले होते. मात्र, अवघ्या एका दिवसानंतर त्याच मित्रांना आर्यनला भावपूर्ण श्रद्धांजली वाहण्याची वेळ आली.

आर्यन हा नानगाव येथील रहिवासी होता. त्याच्या अचानक झालेल्या निधनाने कुटुंबीय, मित्रपरिवार आणि परिसरातील नागरिकांमध्ये शोककळा पसरली आहे.

ऊस वाहतूक करणाऱ्या वाहनांच्या सुरक्षेचा प्रश्न ऐरणीवर

पारगाव-नानगाव महामार्गावर सध्या ऊस वाहतूक करणाऱ्या ट्रॅक्टर-ट्रेलरची मोठी वर्दळ आहे. या अपघातानंतर पुन्हा एकदा या वाहनांच्या सुरक्षेचा प्रश्न समोर आला आहे.

ऊस वाहतूक करणाऱ्या ट्रेलरवर पुरेसे रिफ्लेक्टर, मागील बाजूस स्पष्ट दिसणारी सुरक्षा चिन्हे आणि रात्रीच्या वेळी योग्य प्रकाशव्यवस्था असणे आवश्यक आहे. रस्त्यावर उभी असलेली वाहने अंधारात स्पष्टपणे न दिसल्यास अपघाताचा धोका वाढतो.

नियमांचे उल्लंघन करणाऱ्या वाहनांवर कारवाईची मागणी

या घटनेनंतर नागरिकांनी संबंधित प्रशासनाकडे या मार्गावरील ऊस वाहतूक करणाऱ्या ट्रॅक्टर-ट्रेलरची तपासणी करण्याची मागणी केली आहे.

वाहनांवर आवश्यक सुरक्षा साधने आहेत का, वाहतूक नियमांचे पालन केले जात आहे का, याची तपासणी करावी. तसेच नियमांचे उल्लंघन करणाऱ्या वाहनांवर कठोर कारवाई करावी, अशी मागणी नागरिकांकडून करण्यात येत आहे.