पुण्यात नोकरी करणाऱ्या जळगाच्या २४ वर्षीय तरुणीचा शिमल्यात दुर्दैवी मृत्यू, मैत्रिणींसोबत पर्यटनास गेली अन्….

पुणे : एका भीषण अपघातात जळगाव जिल्ह्यातील एक तरुणी मृत्यूमुखी पडली आहे. शिमला जिल्ह्यातील रामपूर तालुक्यातील हिंदुस्तान-तिबेट मार्गावरील बिथल परिसरात एका पर्यटकांच्या बसवर दरड कोसळली. या दुर्घटनेत दोन महिलांचा मृत्यू झाला. मृतांमध्ये जळगाव शहरातील लक्ष्मी रामचंद्र विराणी (वय 24) यांचा समावेश आहे.

या घटनेमुळे हळहळ व्यक्त केली जात आहे. हिमाचल प्रदेशात मुसळधार पावसाने थैमान घातले असून अनेक नद्यांना पूर आला आहे. या पावसामुळे डोंगराळ भागात दरड कोसळण्याच्या घटना वाढल्या आहेत. मुसळधार पावसामुळे डोंगरावरुन अचानक प्रचंड दगड खाली घसरले आणि थेट खाजगी बसवर कोसळले. या भीषण अपघातात बसचा पुढचा भाग चिरडला गेला.

अपघातानंतर पोलिस आणि आपत्ती व्यवस्थापन पथके तात्काळ घटनास्थळी दाखल झाली. जखमींना बाहेर काढून महात्मा गांधी वैद्यकीय सेवा केंद्र, खानरी येथे उपचारासाठी दाखल करण्यात आले आहे. यात बसमध्ये बसलेल्या दोन महिलांचा जागीच मृत्यू झाला तर किमान 15 पर्यटक जखमी झाले आहेत. शवविच्छेदनानंतर जळगावच्या लक्ष्मी विराणी यांचा मृतदेह त्यांच्या कार्यालयीन सहकारी तरुण रामचंदानी यांच्या ताब्यात देण्यात येणार आहे.

घटनेची माहिती मिळताच जळगाव जिल्हा प्रशासनाने शिमला जिल्हा प्रशासन तसेच हिमाचल प्रदेश शासनाशी तातडीने संपर्क साधला. लक्ष्मी विराणी ही पुण्यातील एका कंपनीत कार्यरत होती. काही मैत्रिणींसह ती पर्यटनासाठी हिमाचल प्रदेशात गेली होती. शिमला येथे फिरत असताना काल अचानक दरड कोसळून तिच्या बसवर मोठा दगडी ढिगारा कोसळला.

यामध्ये अनेक प्रवासी अडकले. जळगावमधील विराणी कुटुंबावर या घटनेनंतर दुःखाचा डोंगर कोसळला आहे. नोकरीसाठी पुण्यात राहणारी लक्ष्मी विराणी पर्यटनासाठी हिमाचलला गेली आणि दुर्दैवाने तिला जीव गमवावा लागला. तिच्या निधनाची बातमी पसरताच कुटूंबाला एकच धक्का बसला. याबाबत तपास सुरु आहे.