शिंदे गटाला मनसेचा मोठा राजकीय धक्का! दक्षिण रत्नागिरीत १०० ते १५० पदाधिकारी-कार्यकर्त्यांचा पक्षप्रवेश; अमित ठाकरेंच्या उपस्थितीत घडामोडी


मुंबई : राज्याच्या राजकारणात पक्षांतरांचे सत्र सुरूच असून, आता महाराष्ट्र नवनिर्माण सेनेने एकनाथ शिंदे यांच्या शिवसेनेला धक्का दिल्याची चर्चा रंगली आहे. दक्षिण रत्नागिरीतील छावा संघटनेचे पदाधिकारी आणि शिंदे गटातील कार्यकर्त्यांनी मनसेचा झेंडा हाती घेतला आहे. दादर येथील मनसेच्या मध्यवर्ती कार्यालयात अमित ठाकरे यांच्या उपस्थितीत हा पक्षप्रवेश सोहळा पार पडला. या घडामोडीमुळे दक्षिण रत्नागिरीच्या राजकीय समीकरणांमध्ये बदल होण्याची शक्यता व्यक्त केली जात आहे.

या पक्षप्रवेशात छावा संघटनेचे जिल्हाध्यक्ष संतोष धावडे यांच्यासह संघटनेतील अनेक कार्यकर्ते मनसेत दाखल झाले. विशेष म्हणजे, शिंदे गटातील जवळपास १०० ते १५० पदाधिकारी आणि कार्यकर्त्यांनीही मनसेमध्ये प्रवेश केल्याची माहिती समोर आली आहे. त्यामुळे मनसेला दक्षिण रत्नागिरीत संघटनात्मक ताकद वाढवण्याची संधी मिळाली आहे, तर शिंदे गटासाठी हा स्थानिक पातळीवरील महत्त्वाचा धक्का मानला जात आहे.

गेल्या काही काळापासून महाराष्ट्रात पक्षांतरांच्या राजकारणाला वेग आला आहे. लोकसभा निवडणुकीत महाविकास आघाडीला राज्यात चांगले यश मिळाले होते. मात्र विधानसभा निवडणुकीत महायुतीने जोरदार पुनरागमन करत सत्ता मिळवली. या निवडणुकीत भाजप सर्वात मोठा पक्ष ठरला, तर एकनाथ शिंदे यांच्या शिवसेनेलाही समाधानकारक यश मिळाले. त्यानंतर महाविकास आघाडीतील अनेक नेते आणि पदाधिकाऱ्यांनी महायुतीची वाट धरली. स्थानिक स्वराज्य संस्थांच्या निवडणुकांच्या पार्श्वभूमीवरही हे पक्षांतराचे राजकारण सुरूच राहिले.

काही दिवसांपूर्वीच शिंदे गटाने उद्धव ठाकरे यांच्या शिवसेनेला मोठा धक्का दिला होता. ठाकरे गटाच्या नऊ खासदारांपैकी सहा खासदारांनी शिंदे गटात प्रवेश केल्याची घडामोड चर्चेत आली होती. त्यामुळे उद्धव ठाकरे यांच्या पक्षासमोर मोठे आव्हान उभे राहिले होते. आता त्याच शिंदे गटातील कार्यकर्ते मनसेत दाखल झाल्याने राजकीय वर्तुळात या घडामोडीची चर्चा सुरू झाली आहे.

दरम्यान, मुंबई महापालिका निवडणुकीत मनसेने उद्धव ठाकरे यांच्या शिवसेनेसोबत युती केली होती. या युतीकडून भाजप आणि शिंदे गटाला कडवे आव्हान देण्याचा प्रयत्न झाला. मात्र अपेक्षित यश मिळवण्यात मनसेला अपयश आले आणि मुंबईत भाजपचा महापौर झाला. या पार्श्वभूमीवर दक्षिण रत्नागिरीतील पक्षप्रवेश मनसेसाठी महत्त्वाचा मानला जात आहे.

आता या नव्या प्रवेशांमुळे दक्षिण रत्नागिरीत मनसेची ताकद किती वाढते आणि शिंदे गटाकडून यावर काय राजकीय भूमिका घेतली जाते, याकडे लक्ष लागले आहे.

Views:

[jp_post_view]

Leave a Reply

Your email address will not be published. Required fields are marked *

error: Content is protected !!