दिवसा कडक ऊन, रात्री गारवा! दिवाळीत महाराष्ट्रातील हवामान बदललं, जाणून घ्या आजचा अंदाज
पुणे : महाराष्ट्रात सध्या हवामानात बदल होताना दिसत आहे. राज्यातील बहुतांश भागांत आकाश निरभ्र असून, पावसाने पूर्णपणे विश्रांती घेतली आहे. दिवसा उन्हाचा कडाका जाणवत असला, तरी रात्रीच्या वेळी वातावरणात गारवा वाढू लागला आहे. त्यामुळे नागरिकांना हळूहळू थंडीची चाहूल लागली आहे.
पश्चिमेकडून वाहणाऱ्या थंड वाऱ्यांमुळे रात्रीच्या तापमानात घट होण्याची शक्यता आहे. दिवाळीच्या दिवसांत राज्यातील नागरिकांना गुलाबी थंडीचा अनुभव घेता येणार आहे. दरम्यान, 7 नोव्हेंबर रोजी राज्यातील विविध भागांमध्ये हवामान कसे राहणार, याबाबत जाणून घेऊया.
कोकण विभागात हवामान प्रामुख्याने कोरडे राहण्याचा अंदाज आहे. मुंबई, ठाणे, रायगड, रत्नागिरी आणि सिंधुदुर्ग जिल्ह्यांमध्ये आकाश स्वच्छ राहण्याची शक्यता आहे. या भागात कमाल तापमान 34 अंश सेल्सिअसच्या आसपास राहू शकते. पुढील काही दिवस पावसाची शक्यता नसल्याने कोरडे हवामान कायम राहण्याचा अंदाज आहे.
उत्तर महाराष्ट्रात उन्हाचा प्रभाव कायम राहणार आहे. धुळे, नंदुरबार, जळगाव आणि नाशिक जिल्ह्यांत कमाल तापमान 33 अंश, तर किमान तापमान 20 अंश सेल्सिअसच्या आसपास राहण्याची शक्यता आहे. दिवसा उष्णता जाणवेल, तर रात्रीच्या वेळी वातावरणात हलका गारवा अनुभवायला मिळेल.
पश्चिम महाराष्ट्रात सध्या पावसाचे कोणतेही संकेत नाहीत. बहुतांश जिल्ह्यांमध्ये आकाश निरभ्र राहून हवामान कोरडे राहण्याची शक्यता आहे. कमाल तापमान 30 अंश सेल्सिअसच्या आसपास राहण्याचा अंदाज असून, दिवसा उन्हाचा प्रभाव आणि रात्री थंडावा असे वातावरण पाहायला मिळेल.
मराठवाड्यात तापमानातील चढ-उतार कायम आहेत. सध्या या भागात उष्ण आणि कोरडे हवामान असून, कमाल तापमान 33 अंश, तर किमान तापमान 22 अंश सेल्सिअसच्या आसपास राहण्याची शक्यता आहे. त्यामुळे दिवसा उन्हाचा तडाखा आणि रात्री काहीसा गारवा असे वातावरण राहणार आहे.
विदर्भात देखील हवामान कोरडे राहण्याचा अंदाज आहे. अकोला, अमरावती, नागपूर, वर्धा, चंद्रपूर आणि गोंदिया जिल्ह्यांमध्ये कमाल तापमान 32 ते 34 अंश सेल्सिअसदरम्यान राहण्याची शक्यता आहे. या भागात पावसाचा कोणताही अलर्ट नसल्याने नागरिकांना उष्ण आणि कोरड्या हवामानाचा सामना करावा लागेल.
एकंदरीत, 7 नोव्हेंबर रोजी महाराष्ट्रातील बहुतांश भागांत पावसाची शक्यता नसून हवामान कोरडे राहण्याचा अंदाज आहे. दिवसा उन्हाचा प्रभाव जाणवणार असला, तरी रात्रीच्या तापमानात हळूहळू घट होऊ शकते. त्यामुळे दिवाळीच्या सणात राज्यात गुलाबी थंडीचा अनुभव घेता येणार आहे.
