विखे-थोरातांची जवळीक वाढली, महाराष्ट्राच्या राजकारणात नवी समीकरणं जुळणार? सुजय विखेंनी अखेर मौन सोडलं; म्हणाले, ‘एकत्र येण्यामागचं कारण फक्त…’
अहिल्यानगर : अहिल्यानगर जिल्हा मध्यवर्ती सहकारी बँकेच्या निवडणुकीमुळे जिल्ह्यातील राजकीय घडामोडींना वेग आला असतानाच खासदार डॉ. सुजय विखे पाटील यांनी केलेल्या विधानाने नव्या चर्चेला तोंड फुटले आहे. काँग्रेसचे ज्येष्ठ नेते बाळासाहेब थोरात आणि विखे कुटुंबीय एकत्र आल्याची चर्चा सुरू असताना, हा एकोपा केवळ सहकार क्षेत्राच्या हितासाठी असल्याचे सुजय विखे यांनी स्पष्ट केले. यामुळे राजकीय आघाडी किंवा पक्षीय समीकरण बदलल्याचा अर्थ काढू नये, असा संदेश त्यांनी दिला आहे. त्याचवेळी जिल्हा बँकेच्या अध्यक्षपदाबाबतही त्यांनी आपली भूमिका मोकळेपणाने मांडली.
जिल्हा मध्यवर्ती सहकारी बँकेच्या निवडणुकीच्या पार्श्वभूमीवर बोलताना सुजय विखे यांनी सर्वपक्षीय नेत्यांनी दाखवलेल्या समन्वयाचे कौतुक केले. निवडणुकीच्या प्रचारादरम्यान एकमेकांवर वैयक्तिक आरोप करण्याचे प्रकार टाळण्यात आले. शेतकरी आणि ठेवीदारांमध्ये संभ्रम निर्माण होईल, अशी वक्तव्येही करण्यात आली नाहीत. आचारसंहितेचे पालन करून निवडणूक प्रक्रिया पार पाडण्यासाठी सर्वांनी सहकार्य केल्याचे त्यांनी सांगितले. निकाल कोणाच्याही बाजूने लागला तरी तो स्वीकारला पाहिजे, अशी भूमिका त्यांनी मांडली. बँकेच्या विकासासाठी निवडून येणाऱ्या संचालकांनी एकत्रितपणे काम करणे आवश्यक असल्याचेही ते म्हणाले.
थोरात-विखे एकत्र आले, पण राजकारणासाठी नाही!
बाळासाहेब थोरात आणि विखे कुटुंबीय एकत्र आल्याच्या चर्चेबाबत विचारले असता सुजय विखे यांनी ही बाब मान्य केली. मात्र, त्यामागे राजकीय हेतू नसल्याचे त्यांनी स्पष्ट केले. बाळासाहेब थोरात हे काँग्रेसचे ज्येष्ठ नेते, पालकमंत्री राधाकृष्ण विखे पाटील हे भाजपचे नेते, तर आमदार संग्राम जगताप हे राष्ट्रवादी काँग्रेसचे नेते आहेत. प्रत्येकाची राजकीय पक्षनिष्ठा वेगळी असली तरी सहकार क्षेत्राच्या हितासाठी एकत्र काम करण्याचा प्रयत्न असल्याचे त्यांनी सांगितले. या सहकार्याचा अर्थ राजकीय समीकरण बदलत आहे, असा काढू नये, असेही त्यांनी स्पष्ट केले.
‘माझा राजकारणात कोणी शत्रू नाही’; पारनेरबाबतही स्पष्ट भूमिका
पारनेरमधील निवडणुकीवर बोलताना सुजय विखे यांनी राजकीय मतभेदांना वैयक्तिक शत्रुत्वाचे स्वरूप देण्यास विरोध केला. लोकसभा निवडणुकीत आपल्या विरोधात कोणी लढले किंवा आपला पराभव झाला, म्हणून त्या व्यक्तीला शत्रू मानण्याचे कारण नाही, असे ते म्हणाले. “राजकारणात माझा कोणीही शत्रू नाही. पारनेरमध्येही माझे कोणाशी शत्रुत्व नाही. निवडणूक ही लोकशाहीची प्रक्रिया आहे. प्रत्येकाला मत मागण्याचा अधिकार आहे,” अशी भूमिका त्यांनी मांडली. आपण अद्याप पारनेरला गेलेलो नसल्याने तेथील परिस्थितीची माहिती नसल्याचेही त्यांनी नमूद केले.
जिल्हा बँकेच्या अध्यक्षपदाचा मोह नाही; सहकारात पक्षीय झेंडे कशाला?
जिल्हा बँकेच्या अध्यक्षपदाबाबतही विखे यांनी आपली भूमिका स्पष्ट केली. या पदाचा आपल्याला कोणताही मोह नसल्याचे त्यांनी सांगितले. सहकारी संस्थांच्या निवडणुकांमध्ये पक्षीय झेंडे, राजकीय नेत्यांचे छायाचित्र किंवा पक्षीय शक्तिप्रदर्शन आणण्याची गरज नसल्याचे मत त्यांनी व्यक्त केले. आपल्या प्रचाराच्या फलकांवर कोणत्याही राजकीय नेत्याचे छायाचित्र वापरले नसल्याचेही त्यांनी सांगितले. काहींनी नेत्यांची छायाचित्रे वापरण्याचा निर्णय घेतला, तो त्यांचा अधिकार असल्याचे ते म्हणाले.
सहकार क्षेत्रातील मतदारांसाठी पक्षीय राजकारणापेक्षा शेतकरी, ठेवीदार आणि संस्थांचे हित महत्त्वाचे असल्याचे या निवडणुकीतून दिसून आल्याचा दावा सुजय विखे यांनी केला. त्यामुळे जिल्हा बँकेच्या निवडणुकीतून निर्माण झालेला थोरात-विखे एकोपा आगामी राजकीय निवडणुकांमध्येही कायम राहणार का, याबाबत उत्सुकता असली तरी सध्या हा एकत्रित प्रयत्न केवळ सहकारापुरताच असल्याचे विखे यांनी स्पष्ट केले आहे.
