पत्नीच्या जिम ट्रेनरचा पहाटेच घरात शिरकाव! झोपलेल्या पतीवर चाकूने सपासप वार; चिमुकलीच्या रडण्याने कट उघडकीस?

गाझियाबाद : दिल्ली सरकारमध्ये वरिष्ठ लेखापाल म्हणून काम करणाऱ्या ३५ वर्षीय शशांक कांथरिया यांच्यावर घरात घुसून चाकूने हल्ला करण्यात आल्याने गाझियाबादच्या वसुंधरा परिसरात खळबळ उडाली आहे. पत्नी प्रिया आणि तिचा जिम प्रशिक्षक प्रताप सिंह यांच्यात कथित प्रेमसंबंध असल्याची माहिती शशांक यांना मिळाली होती. त्यानंतर त्यांनी कुटुंबासह घर बदलून दिल्लीत स्थायिक होण्याचा निर्णय घेतल्याचे पोलिसांच्या तपासातून समोर आले आहे. या हल्ल्यामागे दोघांचा कट असल्याचा संशय असून, पोलिसांनी दोघांनाही अटक केली आहे.

पहाटे घराचा दरवाजा उघडा, हल्लेखोर थेट बेडरूममध्ये

सोमवारी सकाळी शशांक आपल्या लहान मुलीसोबत झोपलेले असताना प्रताप सिंह घराच्या उघड्या मुख्य दरवाजातून आत शिरला. त्याच्याकडे दोन चाकू होते. त्याने झोपलेल्या शशांक यांच्यावर अनेक वार केले. हल्ल्यामुळे शशांक जागे होऊन आरडाओरडा करू लागले, तर मुलगीही घाबरून रडू लागली. आवाज ऐकून शेजारी घराकडे धावले. मात्र, तोपर्यंत हल्लेखोर पळून गेला होता.

जिममध्ये ओळख, त्यानंतर कथित प्रेमसंबंध

पोलिसांच्या माहितीनुसार, शशांक यांची ३२ वर्षीय पत्नी प्रिया नियमितपणे पहाटे पाचच्या सुमारास जिमला जात असे. जानेवारी महिन्यात प्रताप सिंह त्या जिममध्ये प्रशिक्षक म्हणून रुजू झाला. त्यानंतर दोघांमध्ये कथित प्रेमसंबंध निर्माण झाल्याचा आरोप आहे. सप्टेंबरच्या अखेरीस शशांक यांना या संबंधांची माहिती मिळाली. त्यांनी प्रियाला जाब विचारत संबंध संपवण्यास सांगितले. तसेच जिममध्ये जाणे थांबवण्यास किंवा जिम बदलण्यास सांगितल्याचेही तपासात समोर आले आहे.

नवीन घराचा व्यवहार ठरवणार होते शशांक

शशांक यांनी कुटुंबासह गाझियाबाद सोडून दिल्लीत राहायला जाण्याचा निर्णय घेतला होता. नवीन घर शोधण्याच्या त्यांच्या निर्णयाला प्रियाचा विरोध असल्याचे पोलिसांनी सांगितले. रविवारी शशांक नवीन घराचा व्यवहार निश्चित करणार होते. याची माहिती प्रियाने प्रतापला दिली असावी आणि त्यानंतर दोघांनी मिळून हल्ल्याचा कट आखला असावा, असा पोलिसांचा संशय आहे. मात्र, या संशयाची पुष्टी तपासातून होणे बाकी आहे.

शेजाऱ्यांनी पकडण्याचा प्रयत्न केला; सुरक्षारक्षकांनी पाठलाग करून धरले

हल्ल्यानंतर प्रताप पळून जात असताना सोसायटीतील रहिवासी एम. टी. जोशी यांच्या नजरेस त्याच्या हातावरील रक्त पडले. त्यांनी त्याला पकडण्याचा प्रयत्न केला; परंतु प्रतापने त्यांना बाजूला ढकलून पळ काढला. त्यानंतर सोसायटीच्या सुरक्षारक्षकांनी दुचाकीवरून त्याचा पाठलाग केला आणि त्याला पकडून पोलिसांच्या हवाली केले. आरोपीकडून दोन चाकू जप्त करण्यात आले आहेत.

शशांक अतिदक्षता विभागात; दोन्ही आरोपी न्यायालयीन कोठडीत

गंभीर जखमी झालेल्या शशांक यांना शेजाऱ्यांनी तातडीने रुग्णालयात दाखल केले. सध्या त्यांच्यावर अतिदक्षता विभागात उपचार सुरू आहेत. हल्ल्यात त्यांची मुलगी सुरक्षित राहिली. शशांक यांचे भाऊ रितेश यांच्या तक्रारीवरून पोलिसांनी प्रिया आणि प्रताप सिंह यांच्याविरोधात भारतीय न्याय संहितेच्या कलम १०९ (हत्येचा प्रयत्न), ३३३ आणि ६१(२) (गुन्हेगारी कट) अंतर्गत गुन्हा दाखल केला. दोघांना मंगळवारी अटक करून न्यायालयात हजर करण्यात आले. त्यानंतर त्यांची न्यायालयीन कोठडीत रवानगी करण्यात आली असून, पोलिसांकडून पुढील तपास सुरू आहे.