पुरंदर विमानतळाच्या उभारणीच्या दिशेने नवं पाऊल; डीपीआर तयार करण्यासाठी निविदा प्रक्रिया सुरू
पुणे : पुणे जिल्ह्यातील बहुप्रतीक्षित पुरंदर आंतरराष्ट्रीय विमानतळाच्या प्रकल्पाने पुढील टप्प्याकडे वाटचाल सुरू केली आहे. प्रस्तावित छत्रपती संभाजीराजे ग्रीनफिल्ड आंतरराष्ट्रीय विमानतळासाठी सविस्तर प्रकल्प अहवाल (डीपीआर) तयार करण्याच्या दृष्टीने महाराष्ट्र विमानतळ विकास कंपनीने (एमएडीसी) सल्लागार नियुक्तीसाठी निविदा प्रक्रिया सुरू केली आहे. त्यामुळे विमानतळाच्या नियोजनाच्या कामाला गती मिळण्याची अपेक्षा आहे.
सात गावांतील १,२१६ हेक्टर क्षेत्रावर विमानतळ प्रस्तावित
पुरंदर तालुक्यातील पारगाव, कुंभारवळण, वनपुरी, एखतपूर, उदाचीवाडी, मुंजवडी आणि खानवडी या सात गावांतील सुमारे १,२१६ हेक्टर क्षेत्रावर हा विमानतळ उभारण्याचे प्रस्तावित आहे. या प्रकल्पासाठी भूसंपादनाची प्रक्रिया सुरू आहे. यापूर्वी एमएडीसीने संबंधित सात गावांतील जमिनीचा व्यवहार्यता अभ्यास पूर्ण केला आहे.
सर्वेक्षण आणि तांत्रिक अभ्यास होणार
विमानतळाच्या अंतिम आराखड्यासाठी विविध प्रकारची सर्वेक्षणे आणि अभियांत्रिकी अभ्यास करणे आवश्यक आहे. यामध्ये जमिनीची उंची व भूपृष्ठाची रचना, माती आणि खडकांची स्थिती, जमिनीची भार सहन करण्याची क्षमता, पाण्याचा नैसर्गिक निचरा आणि पूरस्थितीचा धोका यांचा अभ्यास केला जाणार आहे.
या सर्वेक्षणांच्या निष्कर्षांच्या आधारे विमानतळाची धावपट्टी, प्रवासी टर्मिनल, अंतर्गत रस्ते, जलनिस्सारण व्यवस्था आणि अन्य आवश्यक सुविधांच्या नियोजनाला दिशा मिळेल.
डीपीआरनंतर पुढील टप्प्यांचा मार्ग स्पष्ट होणार
नियुक्त होणारा सल्लागार तांत्रिक व आर्थिक व्यवहार्यता अभ्यास करण्यासोबतच पुढील निविदा प्रक्रियेच्या व्यवस्थापनासाठीही मदत करणार आहे. सर्वेक्षणे पूर्ण झाल्यानंतर त्यांचे निष्कर्ष आणि अभ्यासाच्या शिफारशींच्या आधारे सविस्तर प्रकल्प अहवाल तयार केला जाईल.
डीपीआर तयार होणे, आवश्यक मंजुरी आणि पुढील निविदा प्रक्रिया हे विमानतळाच्या उभारणीच्या दृष्टीने महत्त्वाचे टप्पे असतील. त्यामुळे सध्या सुरू झालेली सल्लागार नियुक्तीची प्रक्रिया पूर्ण झाल्यानंतर प्रकल्पाच्या पुढील नियोजनाबाबत अधिक स्पष्टता येण्याची अपेक्षा आहे.
