दसरा होताच एकनाथ शिंदे मोठा निर्णय घेणार? मंत्रिमंडळात फेरबदलाची चर्चा, अनेक मंत्र्यांना डच्चू मिळणार?
मुंबई : महाराष्ट्राच्या राजकारणात पुन्हा एकदा मंत्रिमंडळातील संभाव्य फेरबदलांची चर्चा रंगू लागली आहे. दसरा मेळाव्यानंतर उपमुख्यमंत्री एकनाथ शिंदे यांच्या शिवसेनेत मोठे बदल होण्याची शक्यता वर्तवली जात आहे. पक्षातील काही मंत्र्यांच्या कामगिरीवर नाराजी असून, त्यांच्या जागी तरुण आणि सक्रिय आमदारांना संधी दिली जाण्याची चर्चा राजकीय वर्तुळात सुरू आहे.
एकनाथ शिंदे मंत्रिमंडळात फेरबदल करणार?
राजकीय सूत्रांनी दिलेल्या माहितीनुसार, मंत्र्यांच्या कामकाजाचा आढावा घेऊन काहींच्या पदांबाबत निर्णय घेतला जाण्याची शक्यता आहे. सरकारला सत्तेत येऊन जवळपास दोन वर्षे पूर्ण होत असताना अपेक्षित कामगिरी न करणाऱ्या मंत्र्यांना मंत्रिमंडळातून वगळलं जाणार का, याबाबत तर्कवितर्क लढवले जात आहेत.
दुसरीकडे, पक्षातील तरुण आणि कार्यक्षम आमदारांना मंत्रिपदाची संधी मिळण्याची शक्यता चर्चेत आहे. त्यामुळे शिंदे यांच्या शिवसेनेतील अनेक नेत्यांचं लक्ष संभाव्य मंत्रिमंडळ विस्ताराकडे लागलं आहे.
दसऱ्यानंतर शिंदे ‘भाकरी फिरवणार’?
दसरा मेळाव्यानंतर पक्षांतर्गत बदल होण्याची चर्चा सुरू झाली आहे. काही राज्यमंत्र्यांना कॅबिनेट मंत्रिपद देऊन बढती दिली जाऊ शकते, अशीही शक्यता वर्तवली जात आहे. असे बदल झाल्यास पक्षातील सध्याची राजकीय समीकरणं बदलण्याची शक्यता आहे.
आगामी हिवाळी अधिवेशनाच्या पार्श्वभूमीवर मंत्र्यांच्या कामकाजाला गती देणं आणि पक्षाची संघटनात्मक ताकद वाढवणं, या दृष्टीने फेरबदल महत्त्वाचे ठरू शकतात. मात्र, या संभाव्य बदलांबाबत अद्याप अधिकृत घोषणा झालेली नाही.
कोणाला संधी, कोणाचा पत्ता कट होणार?
मंत्रिमंडळात फेरबदल झाल्यास कोणत्या मंत्र्यांना डच्चू मिळणार आणि कोणत्या नव्या चेहऱ्यांना संधी मिळणार, याबाबत राजकीय वर्तुळात उत्सुकता आहे. तरुण आमदारांना संधी देण्याच्या चर्चेमुळे शिवसेनेतील इच्छुक नेत्यांच्या आशा वाढल्या आहेत.
सध्या मंत्रिमंडळातील बदलांबाबतच्या चर्चा राजकीय सूत्रांच्या माहितीवर आधारित आहेत. एकनाथ शिंदे यांच्याकडून अधिकृत निर्णय जाहीर झालेला नसल्याने प्रत्यक्षात मंत्रिमंडळात फेरबदल होणार का आणि झाल्यास कोणाला संधी मिळणार, हे आगामी काळात स्पष्ट होईल.
