अभिजीत दीपकेंना अटक होण्याआधीच आखली होती पुढची चाल! तिघांना पोलिसांनी ताब्यात घेतलं, आता आंदोलनाची धुरा ‘या’ तरुणाकडे; कोण आहे अजिंक्य शिंदे?
नवी दिल्ली : जंतर-मंतरवरील आंदोलनात प्रमुख नेत्यांना ताब्यात घेतल्यानंतरही कॉकरोच जनता पार्टीचं (सीजेपी) आंदोलन चर्चेत आहे. अभिजीत दीपके, सौरव दास आणि आशुतोष रांका यांना दिल्ली पोलिसांनी ताब्यात घेतल्याची माहिती समोर आली. मात्र, या कारवाईनंतर आंदोलनाचं नेतृत्व कोण करणार, याचं उत्तर अभिजीत दीपके यांनी आधीच तयार ठेवलेल्या एका व्हिडीओतून दिलं. आपल्या अनुपस्थितीत आंदोलनाची जबाबदारी अजिंक्य शिंदे यांच्याकडे सोपवण्याचा संदेश त्यांनी कार्यकर्त्यांना दिला होता.
मुख्य निवडणूक आयुक्त ज्ञानेश कुमार यांच्या विरोधात जंतर-मंतरवर आंदोलन सुरू असताना ही घडामोड घडली. दीपके हे मुंबईहून विमानाने दिल्लीला रवाना झाले होते. दिल्ली विमानतळावर पोहोचण्याआधीच त्यांना विमानात ताब्यात घेण्यात आल्याचं वृत्त आहे. त्यांच्यासोबत सौरव दास आणि आशुतोष रांका यांनाही ताब्यात घेतल्याची माहिती समोर आली. त्यामुळे आंदोलनाचं नेतृत्व आता कोण करणार, असा प्रश्न उपस्थित झाला. मात्र, दीपके यांनी संभाव्य कारवाईचा अंदाज घेऊन पर्यायी नेतृत्वाची व्यवस्था केल्याचं त्यांच्या संदेशावरून दिसतं.
‘हा व्हिडीओ तुम्ही पाहत असाल, तर मला, आशुतोष आणि सौरवला अटक झाली आहे,’ असं दीपके यांनी चित्रफितीत म्हटलं. त्यानंतर अजिंक्य शिंदे या मोहिमेचं नेतृत्व करतील, त्यांच्या सूचनांचं पालन करा आणि सीजेपीची पुढील वाटचाल त्यांच्या मार्गदर्शनाखाली सुरू ठेवा, असं आवाहन त्यांनी केलं. तिघांना ताब्यात घेतल्यानंतर सीजेपीकडून हा व्हिडीओ प्रसारित करण्यात आला.
कोण आहेत अजिंक्य शिंदे?
अजिंक्य शिंदे हे सीजेपीच्या राष्ट्रीय संघटनेचे प्रभारी आहेत. ऑक्टोबर महिन्याच्या सुरुवातीला मुंबईतील शिवाजी पार्क येथे झालेल्या आंदोलनाच्या आयोजनातही त्यांचा सहभाग होता. या आंदोलनाशी संबंधित दाखल झालेल्या गुन्ह्यात त्यांचं नाव आरोपी म्हणून असल्याचं वृत्तात नमूद करण्यात आलं आहे. मात्र, आरोपी असणं म्हणजे आरोप सिद्ध होणं नव्हे.
शिंदे हे ‘स्कूल ठीक करो’ या मोहिमेशीही जोडलेले आहेत. इन्स्टाग्रामवर त्यांचे सुमारे २३ हजार २०० अनुयायी असल्याची माहिती देण्यात आली आहे. सीजेपीच्या आंदोलनातील त्यांच्या भूमिकेमुळे आता त्यांच्याकडे नेतृत्वाची जबाबदारी येणार असल्याचं दीपके यांच्या संदेशातून स्पष्ट झालं आहे.
दरम्यान, दिल्लीतील आंदोलनाला तणावाचं वळण लागल्याचं वृत्त आहे. आकाशवाणी भवन परिसरात दगडफेक झाल्याची माहिती समोर आली आहे. या पार्श्वभूमीवर प्रमुख नेत्यांना ताब्यात घेतल्यानंतर सीजेपी आंदोलनाची पुढील दिशा काय असेल आणि अजिंक्य शिंदे कार्यकर्त्यांना कशा सूचना देणार, याकडे लक्ष लागलं आहे.
