ऑक्टोबर हिटने महाराष्ट्र होरपळणार! ‘या’ तारखेपर्यंत उष्णतेची लाट धडकणार, हवामान खात्याचा इशारा

पुणे : पावसाळा संपताच महाराष्ट्रातील हवामानात मोठा बदल झाला आहे. राज्यातील अनेक भागांमध्ये तापमानाचा पारा झपाट्याने वाढत असून, मुंबईसह अनेक जिल्ह्यांमध्ये उकाड्याने नागरिक हैराण झाले आहेत. ऑक्टोबर महिन्यातच उन्हाचा तीव्र चटका जाणवू लागल्याने नागरिकांना घामाच्या धारा लागल्या आहेत. वाढत्या तापमानामुळे आरोग्याच्या समस्याही उद्भवण्याची शक्यता आहे.

अशातच भारतीय हवामान विभागाने (IMD) उष्णतेबाबत महत्त्वाचा इशारा दिला आहे. मुंबईसह महाराष्ट्रातील काही भागांमध्ये १२ ऑक्टोबरपर्यंत उष्णतेची लाट येण्याचा अंदाज वर्तवण्यात आला आहे. त्यामुळे वाढत्या उष्णतेच्या पार्श्वभूमीवर नागरिकांनी काळजी घेण्याचे आणि उन्हाच्या तडाख्यापासून स्वतःचा बचाव करण्याचे आवाहन करण्यात येत आहे.

हवामान विभागाच्या अंदाजानुसार, दक्षिण कोकणातील काही जिल्ह्यांमध्ये उष्णतेची लाट जाणवण्याची शक्यता आहे. तर उत्तर कोकणातील काही भागांमध्ये उष्ण आणि दमट हवामान राहण्याचा अंदाज आहे. पुढील ४८ तासांत राज्यातील काही भागांतील तापमानात २ ते ३ अंश सेल्सिअसने वाढ होऊ शकते. त्यानंतरही तापमानात १ ते ३ अंश सेल्सिअसची वाढ होण्याची शक्यता वर्तवण्यात आली आहे. राज्यातील इतर काही जिल्ह्यांमध्ये कमाल तापमान ३७ ते ३९ अंश सेल्सिअसपर्यंत जाण्याचा अंदाज आहे.

ऑक्टोबर हिटचा विदर्भाला तडाखा

विदर्भातही ऑक्टोबर हिटचा प्रभाव जाणवू लागला आहे. विभागातील अनेक जिल्ह्यांमध्ये तापमानात वाढ झाल्याने नागरिकांना उकाड्याचा सामना करावा लागत आहे. काही भागांमध्ये तापमान ४० अंश सेल्सिअसच्या जवळ पोहोचले आहे. नागपूरमध्ये ३६ अंश सेल्सिअस तापमानाची नोंद झाली असून, इतर जिल्ह्यांमध्येही उन्हाचा कडाका वाढला आहे. तापमानातील वाढ आणि दमट हवामानामुळे नागरिक त्रस्त झाले आहेत.

मोसमी पावसाने माघार घेतल्यानंतर नागपूर शहरात ऑक्टोबर हिटचा प्रभाव अधिक जाणवू लागला आहे. गेल्या काही दिवसांपासून नागपूरमधील तापमान ३५ अंश सेल्सिअसच्या पुढे नोंदवले जात आहे. ऑक्टोबर महिन्यातच उन्हाचे चटके जाणवत असल्याने नागरिकांना दिलासा मिळण्याची प्रतीक्षा आहे. पुढील काही दिवस उकाडा कायम राहण्याची शक्यता हवामान विभागाने वर्तवली आहे.

मुंबईतही तापमानाचा पारा वाढला

मुंबईत पावसाळा संपल्यानंतर काही दिवसांतच तापमानात मोठी वाढ झाली आहे. गुरुवारी सांताक्रूझ येथे कमाल तापमान ३७.६ अंश सेल्सिअस नोंदवण्यात आले. हे तापमान सरासरीपेक्षा तब्बल ४.५ अंश सेल्सिअसने अधिक होते. त्यामुळे मुंबईसह रायगड जिल्ह्यातील काही भागांमध्ये उष्णतेचा प्रभाव जाणवत आहे. भारतीय हवामान विभागाने या भागांसाठी उष्णतेबाबत सतर्कतेचा इशारा दिला आहे.

मुंबईत ३ ऑक्टोबर रोजी नैऋत्य मोसमी पावसाने माघार घेतल्यानंतर तापमानात सातत्याने वाढ होत आहे. सांताक्रूझ येथे ऑक्टोबर महिन्यातील आतापर्यंतचे सर्वाधिक तापमान १७ ऑक्टोबर २०१५ रोजी ३८.६ अंश सेल्सिअस नोंदवण्यात आले होते. तर कुलाबा येथे २२ ऑक्टोबर १९६८ रोजी कमाल तापमान ३९.५ अंश सेल्सिअस नोंदवले गेले होते.

एकीकडे पावसाळ्याचा निरोप, तर दुसरीकडे वाढता उन्हाचा तडाखा यामुळे महाराष्ट्रातील नागरिकांना ऑक्टोबर हिटचा सामना करावा लागत आहे. त्यामुळे उन्हात बाहेर पडताना पुरेसे पाणी पिणे, शक्यतो दुपारच्या कडक उन्हात बाहेर जाणे टाळणे आणि उष्णतेशी संबंधित त्रास जाणवल्यास त्वरित योग्य वैद्यकीय मदत घेणे महत्त्वाचे आहे.