पुणे पदवीधरच्या मैदानात भाजपचा ‘हा’ चेहरा कोण? शिक्षण, माध्यम अन् १८ हजार महिलांच्या नेटवर्कमागे डॉ. स्मिता जाधव
पुणे : शिक्षण क्षेत्रापासून माध्यमविश्वापर्यंत, महिला सक्षमीकरणापासून व्यवस्थापन क्षेत्रापर्यंत विविध जबाबदाऱ्या सांभाळणाऱ्या डॉ. स्मिता योगेश जाधव आता राजकीय मैदानात उतरल्या आहेत. भाजपने ४ ऑक्टोबर २०२६ रोजी पुणे विभाग पदवीधर मतदारसंघासाठी त्यांच्या उमेदवारीची अधिकृत घोषणा केली. त्यामुळे पुणे पदवीधर मतदारसंघाच्या निवडणुकीत ‘नेमक्या कोण आहेत डॉ. स्मिता जाधव?’ याची चर्चा सुरू झाली आहे.
डॉ. जाधव यांची शैक्षणिक कारकीर्द पाहिली तर त्यांच्या नावामागे विविध क्षेत्रांचा अभ्यास दिसून येतो. त्यांनी शिक्षण विषयात पीएच.डी., आर्थिक व्यवस्थापन विषयात एमबीए आणि संगणक अभियांत्रिकीची पदवी घेतली आहे. शिक्षण, व्यवस्थापन आणि तंत्रज्ञान या तीनही क्षेत्रांचा अनुभव त्यांच्या शैक्षणिक पार्श्वभूमीत पाहायला मिळतो.
सध्या त्या पिंपरी, पुणे येथील डॉ. डी. वाय. पाटील विद्यापीठाच्या प्र-कुलगुरू म्हणून कार्यरत आहेत. यासोबतच डॉ. डी. वाय. पाटील विद्यापीठ सोसायटीच्या सचिवपदाची जबाबदारीही त्या सांभाळत आहेत. शिक्षण क्षेत्रात नवकल्पना, सर्जनशीलता आणि धोरणात्मक नेतृत्वाच्या माध्यमातून काम करण्यावर त्यांचा भर राहिला आहे.
मात्र डॉ. स्मिता जाधव यांची ओळख केवळ शिक्षण क्षेत्रापुरती मर्यादित नाही. माध्यम क्षेत्रातही त्या सक्रिय आहेत. पुढारी प्रकाशनाच्या संचालक म्हणून त्या जबाबदारी सांभाळतात. याशिवाय टोमॅटो ९४.३ एफएम आणि आपलं एफएम ९१.९च्या कार्यकारी संचालक म्हणूनही त्यांनी काम केले आहे. त्यामुळे शिक्षण संस्थांचे व्यवस्थापन आणि माध्यम क्षेत्रातील नेतृत्वाचा अनुभव त्यांच्या कार्याचा महत्त्वाचा भाग आहे.
महिला सक्षमीकरणाच्या कामातही त्यांचा सहभाग ठळक राहिला आहे. कस्तुरी क्लबच्या अध्यक्षा म्हणून त्यांनी महिलांना सामाजिक सहभाग, नेतृत्व आणि उद्योजकतेच्या संधी मिळवून देण्याच्या दिशेने काम केले. कस्तुरी क्लबच्या माध्यमातून १८ हजारांहून अधिक महिलांचे नेटवर्क उभारण्यात त्यांची भूमिका असल्याचे सांगितले जाते. या व्यासपीठातून महिलांना सामाजिक उपक्रमांमध्ये सहभागी होण्यासोबतच नेतृत्वगुण आणि उद्योजकतेला प्रोत्साहन देण्यात आले.
विविध क्षेत्रातील कामाची दखल घेत डॉ. जाधव यांना अनेक पुरस्कारांनी गौरवण्यात आले आहे. वेणुताई चव्हाण युवती पुरस्कार, भारत सन्मान निधी पुरस्कार, ग्लोबल वुमेन इन्स्पिरेशन अवॉर्ड, एज्युप्रन्योर ऑफ द इयर, बेस्ट सीईओ, उच्च शिक्षण क्षेत्रातील उत्कृष्ट नेतृत्व पुरस्कार आणि प्राइड ऑफ इंडिया पुरस्कार यांचा त्यात समावेश आहे.
या पार्श्वभूमीवर भाजपने त्यांना पुणे पदवीधर मतदारसंघातून संधी दिली आहे. त्यांच्या उमेदवारीमुळे आता शिक्षण, रोजगार, कौशल्यविकास, उच्च शिक्षण, महिला सक्षमीकरण आणि उद्योजकता यांसारखे विषय निवडणुकीच्या चर्चेत येण्याची शक्यता आहे. मात्र या मुद्द्यांवर त्यांची नेमकी भूमिका आणि प्रचाराची दिशा पुढील काळात स्पष्ट होणार आहे.
दरम्यान, पुणे पदवीधर मतदारसंघासाठी उमेदवारी जाहीर करताना भाजपने नागपूर विभाग पदवीधर मतदारसंघातून सुधाकर विठ्ठलराव कोहळे, तर पुणे विभाग शिक्षक मतदारसंघातून कौस्तुभ मुरलीधर गावडे यांनाही उमेदवारी दिली आहे. त्यामुळे विधान परिषद निवडणुकीसाठी पक्षाने तीन उमेदवारांची नावे जाहीर केली आहेत.
पुणे पदवीधर मतदारसंघातील निवडणुकीच्या पार्श्वभूमीवर आता डॉ. स्मिता जाधव यांचा शिक्षण क्षेत्रातील अनुभव, माध्यम व्यवस्थापनातील भूमिका आणि महिला सक्षमीकरणाच्या कामाचा राजकीय प्रवासात कसा वापर होतो, याकडे लक्ष लागले आहे. विविध क्षेत्रांतील कामाचा अनुभव घेऊन त्या आता पदवीधर मतदारांच्या प्रश्नांसाठी निवडणुकीच्या रिंगणात उतरल्या आहेत.
