दिशा सालियान प्रकरण, ५०० कोटींच्या नोटिशीवर आदित्य ठाकरेंचा पलटवार; २६ पानी उत्तरातून आरोप फेटाळले, म्हणाले- “निष्पक्ष चौकशी करा”

मुंबई : दिशा सालियान प्रकरणावरून सुरू असलेल्या कायदेशीर वादाला आता आणखी एक महत्त्वाचं वळण मिळालं आहे. दिशा सालियानचे वडील सतीश सालियान यांनी शिवसेना ठाकरे गटाचे नेते आदित्य ठाकरे यांना पाठवलेल्या ५०० कोटी रुपयांच्या मानहानीच्या नोटिशीला अखेर उत्तर देण्यात आलं आहे. आदित्य ठाकरे यांच्या वकिलांनी तब्बल २६ पानी उत्तर देत नोटिशीतील आरोप फेटाळून लावले आहेत.

सतीश सालियान यांनी आदित्य ठाकरे यांच्यावर मानहानीकारक वक्तव्य केल्याचा आरोप करत ५०० कोटी रुपयांची नुकसानभरपाई मागितली होती. याच नोटिशीत सार्वजनिक माफीची मागणीही करण्यात आल्याचं वृत्त आहे. याशिवाय माजी गृहमंत्री अनिल देशमुख यांनाही अशाच प्रकारची नोटीस देण्यात आल्याची माहिती समोर आली होती.

२६ पानी उत्तरातून नेमकं काय सांगितलं?

आदित्य ठाकरे यांच्या वकिलांनी दिलेल्या उत्तरात नोटिशीतील आरोप तथ्यहीन असल्याचं म्हटलं आहे. विशेष म्हणजे १६ सप्टेंबर रोजी आदित्य ठाकरे यांनी केलेल्या सोशल मीडिया पोस्टचा दाखला देण्यात आला आहे. या पोस्टमध्ये सतीश सालियान यांचं नाव कुठेही घेण्यात आलेलं नव्हतं, असा दावा त्यांच्या बाजूने करण्यात आला आहे.

तसंच पोस्टमधील कोणताही विशिष्ट उल्लेख सतीश सालियान यांच्याकडे निर्देश करणारा नसल्याचंही उत्तरात नमूद करण्यात आलं आहे. त्यामुळे संबंधित पोस्टचा अर्थ वेगळ्या पद्धतीने लावून करण्यात आलेले आरोप मान्य नसल्याची भूमिका आदित्य ठाकरे यांच्या वकिलांनी मांडली आहे.

“बदनामी करण्याचा कोणताही हेतू नाही”

सतीश सालियान यांची बदनामी करण्याचा कोणताही हेतू नसल्याचं आदित्य ठाकरे यांच्या वकिलांनी स्पष्ट केलं आहे. उलट दिशा सालियान प्रकरणातील आरोपांची अधिकृत आणि निष्पक्ष चौकशी व्हावी, अशी मागणी त्यांच्या उत्तरातून करण्यात आली आहे.

दरम्यान, सतीश सालियान यांनी दिशा सालियानच्या मृत्यूची नव्याने चौकशी करण्यासाठी मुंबई उच्च न्यायालयात याचिका दाखल केली होती. त्यानंतर न्यायालयाच्या निर्देशानुसार सीबीआयने या प्रकरणात तपास सुरू केला आहे. सीबीआयने नोंदवलेल्या एफआयआरमध्ये आदित्य ठाकरे यांच्यासह काही व्यक्तींची नावं असल्याचं वृत्त आलं आहे; मात्र एफआयआरमध्ये नाव असणं आणि आरोपी ठरणं यामध्ये कायदेशीर फरक आहे.

नोटीसपासून उत्तरापर्यंत वाद चिघळला

५०० कोटींची नोटीस देण्यासाठी सतीश सालियान आणि त्यांचे वकील मातोश्रीवर पोहोचले होते. त्यावेळी काही शिवसैनिकांनी त्यांना अडवण्याचा प्रयत्न केल्याने परिसरात काही काळ तणावाचं वातावरण निर्माण झालं होतं. अखेर आदित्य ठाकरे यांच्या वकिलांनी नोटीस स्वीकारली.

आता या नोटिशीला २६ पानी उत्तर देत आदित्य ठाकरे यांच्या बाजूने आरोप फेटाळण्यात आले आहेत. त्यामुळे ५०० कोटी रुपयांच्या मानहानीच्या नोटिशीनंतर पुढील कायदेशीर पाऊल सतीश सालियान यांच्या बाजूने काय घेतलं जातं, याकडे लक्ष लागलं आहे.