‘डान्स शिकवतो, घरी ये’ म्हणत अल्पवयीन मुलीला बोलावलं; १५ दिवस अत्याचाराचा आरोप, धमकी दिल्याचीही तक्रार, धाराशिवमध्ये खळबळ
धाराशिव : डान्स शिकण्याच्या निमित्ताने घराबाहेर पडलेली अल्पवयीन मुलगी तब्बल १५ दिवसांच्या काळात वारंवार एका ठिकाणी जात होती; मात्र या भेटींमागे नेमकं काय घडत होतं, याची माहिती कुटुंबीयांना नव्हती. अखेर भीती आणि त्रास सहन न झाल्याने मुलीने आईसमोर घडलेला प्रकार सांगितला आणि त्यानंतर हे गंभीर प्रकरण समोर आले. धाराशिव शहरात डान्स शिकवण्याच्या बहाण्याने अल्पवयीन मुलीवर लैंगिक अत्याचार केल्याचा आरोप एका डान्स टीचरवर करण्यात आला आहे.
पोलिसांकडे दाखल झालेल्या तक्रारीनुसार, २८ ऑगस्ट रोजी दुपारी सुमारे १२ वाजता संबंधित आरोपीने मुलीला डान्स शिकवण्यासाठी आपल्या घरी बोलावले. त्यानंतर २८ ऑगस्ट ते १२ सप्टेंबर या कालावधीत मुलीला वारंवार घरी बोलावण्यात आल्याचा आरोप आहे. या काळात तिच्यावर लैंगिक अत्याचार केल्याचे तक्रारीत नमूद करण्यात आले आहे.
या प्रकाराची कुणाला माहिती दिल्यास गंभीर परिणाम भोगावे लागतील, अशी धमकी आरोपीने दिल्याचाही आरोप करण्यात आला आहे. त्यामुळे घाबरलेल्या मुलीने सुरुवातीला हा प्रकार आई-वडिलांसह कुटुंबातील कोणालाही सांगितला नाही. मात्र, संबंधित व्यक्तीकडून होणारा त्रास वाढल्यानंतर तिने अखेर आईला विश्वासात घेत संपूर्ण घटना सांगितली.
मुलीने दिलेली माहिती ऐकल्यानंतर कुटुंबीयांनी तातडीने पोलिसांशी संपर्क साधला. १४ सप्टेंबर रोजी पीडित मुलीच्या आईने धाराशिव शहर पोलीस ठाण्यात फिर्याद दाखल केली. तक्रारीची दखल घेत पोलिसांनी आरोपीविरोधात गुन्हा दाखल केला आहे.
या प्रकरणात भारतीय न्याय संहितेतील संबंधित कलमांसह पोक्सो कायदा आणि अनुसूचित जाती-जमाती अत्याचार प्रतिबंधक कायद्यानुसार गुन्हा दाखल करण्यात आला आहे. अल्पवयीन मुलीशी संबंधित हे प्रकरण असल्याने पोलिसांकडून तक्रारीतील आरोप, उपलब्ध पुरावे आणि संबंधित व्यक्तींचे जबाब यांचा तपास केला जात आहे.
दरम्यान, २८ ऑगस्टपासून १२ सप्टेंबरपर्यंत नेमक्या कोणत्या परिस्थितीत मुलीला घरी बोलावण्यात आले, तसेच तक्रारीतील सर्व आरोपांबाबत पुढील तपासातून अधिक माहिती स्पष्ट होणार आहे. या घटनेने धाराशिव शहरात खळबळ उडाली असून, पोलिसांच्या पुढील कारवाईकडे लक्ष लागले आहे.
