महिनाअखेरीस महागाईचा झटका! CNG पुन्हा महागला; 4 महिन्यांत जवळपास 10 रुपयांची वाढ, मुंबई-महाराष्ट्रात काय भाव?

मुंबई : महागाईने त्रस्त असलेल्या सर्वसामान्यांना पुन्हा एकदा मोठा धक्का बसला आहे. पेट्रोल-डिझेल आणि LPGच्या किमतीनंतर आता CNGच्या दरातही मोठी वाढ करण्यात आली आहे. इंद्रप्रस्थ गॅस लिमिटेडने (IGL) दिल्ली-NCRमध्ये CNGच्या दरात तब्बल 3.89 रुपये प्रति किलोने वाढ केली आहे. ही दरवाढ 29 ऑगस्ट 2026 रोजी सकाळी 6 वाजल्यापासून लागू झाली आहे.

या दरवाढीनंतर दिल्लीमध्ये CNGचा दर 83.09 रुपयांवरून थेट 86.98 रुपये प्रति किलो झाला आहे. म्हणजेच वाहनचालकांना आता प्रत्येक किलो CNGसाठी जवळपास 4 रुपये अधिक मोजावे लागणार आहेत.

कोणत्या शहरात किती झाला CNGचा दर?

IGLच्या नव्या दरानुसार दिल्लीमध्ये CNG 86.98 रुपये प्रति किलो झाला आहे. नोएडा आणि गाझियाबादमध्ये CNGचा दर 95.59 रुपये प्रति किलो, गुरुग्राममध्ये 92.01 रुपये प्रति किलो, तर मेरठमध्ये 95.47 रुपये प्रति किलो झाला आहे. शहरानुसार VAT आणि इतर करांमध्ये फरक असल्यामुळे CNGच्या किमती वेगवेगळ्या आहेत.

यावर्षी पाचव्यांदा CNG महागला

विशेष म्हणजे दिल्ली-NCRमध्ये यावर्षी CNGच्या दरात झालेली ही पाचवी वाढ असल्याचं वृत्त आहे. याआधी मे महिन्यातही IGLने दहा दिवसांच्या कालावधीत चार टप्प्यांत CNGच्या दरात एकूण 6 रुपयांची वाढ केली होती. आता ऑगस्टमध्ये पुन्हा 3.89 रुपयांची वाढ करण्यात आली आहे.

CNG महागण्यामागे कारण काय?

आंतरराष्ट्रीय बाजारात LNG म्हणजेच Liquefied Natural Gasच्या किमती वाढल्याचा थेट परिणाम CNGच्या दरावर झाला आहे. IGLच्या म्हणण्यानुसार, आयात केलेल्या LNGच्या किमती वाढल्यामुळे कंपनीच्या इनपुट गॅस खर्चावर मोठा दबाव निर्माण झाला आहे. त्यामुळे हा वाढीव खर्च काही प्रमाणात भरून काढण्यासाठी CNGच्या दरात सुधारणा करण्यात आली आहे.

पश्चिम आशियातील तणाव आणि होर्मुझच्या सामुद्रधुनीमार्गे LNGच्या वाहतुकीवर निर्माण झालेली अनिश्चितता यामुळे आंतरराष्ट्रीय गॅसच्या किमतीवर परिणाम झाला आहे. IGLने दिलेल्या माहितीनुसार, युरोपियन TTF आणि आशियाई JKM LNGच्या किमतींमध्ये फेब्रुवारीच्या तुलनेत ऑगस्टमध्ये मोठी वाढ झाली आहे.

सामान्यांच्या खिशावर कसा परिणाम होणार?

CNGच्या दरवाढीचा थेट परिणाम CNGवर चालणाऱ्या कार, ऑटो, टॅक्सी आणि व्यावसायिक वाहनांवर होणार आहे. विशेषतः दररोज मोठ्या प्रमाणात वाहन चालवणाऱ्या चालकांचा इंधन खर्च वाढणार आहे. त्यामुळे भविष्यात प्रवासी वाहतूक आणि मालवाहतुकीच्या खर्चावरही त्याचा परिणाम होण्याची शक्यता आहे.

दरम्यान, मुंबईसह महाराष्ट्रातील CNGच्या दरात या दरवाढीची घोषणा सध्या झालेली नाही. त्यामुळे महाराष्ट्रातील वाहनचालकांना सध्यातरी या वाढीचा थेट फटका बसलेला नाही. मात्र, आंतरराष्ट्रीय गॅस बाजारातील परिस्थिती आणि स्थानिक कंपन्यांचे निर्णय यावर पुढील दरबदल अवलंबून राहतील.