वाढदिवसाचा आनंद क्षणात शोकात बुडाला! दर्ग्याहून तलावात अंघोळीसाठी गेले अन् चौघांचा बुडून मृत्यू; राजकोटमध्ये हृदयद्रावक घटना
राजकोट : वाढदिवसाच्या आनंदासाठी घराबाहेर पडलेल्या कुटुंबावर काही क्षणांतच दुःखाचा डोंगर कोसळला. दर्ग्यावर दर्शन घेऊन जेवण केल्यानंतर तलावात अंघोळीसाठी उतरलेल्या मुलांपैकी एक जण खोल पाण्यात बुडू लागला. त्याला वाचवण्यासाठी धावलेल्या तिघांचाही पाण्यात बुडून मृत्यू झाला. राजकोट शहराजवळील बेडी गावात घडलेल्या या दुर्घटनेत चार जणांचा जीव गेला असून, मृतांमध्ये दोन सख्ख्या भावांचा समावेश आहे.
मिळालेल्या माहितीनुसार, 15 ऑगस्ट रोजी 10 वर्षीय सोहन सोरा याचा वाढदिवस होता. वाढदिवसानिमित्त कुटुंबीय सोहनला सोबत घेऊन कुवाडवा रोड पोलीस ठाण्याच्या हद्दीतील बेडी गावाजवळ असलेल्या वीडी पीर दर्ग्यावर गेले होते. दर्ग्यावर दर्शन घेतल्यानंतर सर्वांनी तेथे जेवण केले. त्यानंतर काही मुले आणि तरुण तलावात अंघोळ करण्यासाठी गेले.
अंघोळ करताना 5 वर्षीय सैफू खोल पाण्यात गेला आणि बुडू लागला. त्याला वाचवण्यासाठी एका तरुणासह आणखी तिघांनी तलावात उडी घेतली. मात्र, बचावाचा प्रयत्न करत असतानाच परिस्थिती नियंत्रणाबाहेर गेली आणि चौघेही खोल पाण्यात बुडाले. काही क्षणांत ते पाण्याखाली दिसेनासे झाल्याने परिसरात एकच गोंधळ उडाला.
घटना लक्षात येताच स्थानिकांनी तातडीने मदतकार्य सुरू केले. अथक प्रयत्नांनंतर चौघांनाही तलावातून बाहेर काढण्यात आले. त्यांना तातडीने राजकोट सिव्हिल रुग्णालयात दाखल करण्यात आले; मात्र डॉक्टरांनी तपासून सर्वांना मृत घोषित केले.
या दुर्घटनेत 10 वर्षीय सोहन सोरा, 5 वर्षीय सैफू/साहिल सोरा, 18 वर्षीय साहिल सोरा आणि 10 वर्षीय अलीफा सोरा यांचा मृत्यू झाल्याची माहिती आहे. सोहन आणि सैफू हे सख्खे भाऊ होते. विशेष म्हणजे ज्या दिवशी सोहनचा वाढदिवस होता, त्याच दिवशी त्याचा मृत्यू झाल्याने कुटुंबीयांवर दुःखाचा डोंगर कोसळला आहे.
दरम्यान, घटनेची माहिती मिळताच कुवाडवा रोड पोलीस घटनास्थळी दाखल झाले. पोलिसांनी स्थानिकांच्या मदतीने बचावकार्य राबवले तसेच घटनास्थळाची पाहणी करून तपास सुरू केला आहे. एसीपी भावेश जाधव यांनीही घटनेची माहिती दिली असून, दर्ग्यावर दर्शन आणि जेवण झाल्यानंतर तलावात अंघोळीसाठी गेल्यानंतर ही दुर्घटना घडल्याचे स्पष्ट केले. वाढदिवसाच्या आनंदासाठी सुरू झालेला दिवस चौघांच्या मृत्यूमुळे शोकमय झाल्याने परिसरात हळहळ व्यक्त होत आहे.
