विद्यार्थ्यांसाठी आनंदाची बातमी! ऑगस्टमध्ये मिळणार तब्बल ‘इतक्या’ सुट्ट्या; पाहा संपूर्ण यादी..
पुणे : शाळा सुरू होऊन दोन महिने पूर्ण होत असतानाच विद्यार्थ्यांसाठी आनंदाची बातमी समोर आली आहे. ऑगस्ट महिन्यात शनिवार-रविवारच्या नियमित सुट्ट्यांसोबतच राष्ट्रीय आणि धार्मिक सणांच्या सुट्ट्यांची जोड मिळणार असल्याने विद्यार्थ्यांना अनेक दिवस विश्रांतीचा आनंद घेता येणार आहे.
ऑगस्टमध्ये साप्ताहिक सुट्ट्यांसह विविध सण आणि राष्ट्रीय दिवसांमुळे काही शाळांमध्ये सुमारे 12 दिवस सुट्ट्या मिळण्याची शक्यता आहे. मात्र, सुट्ट्यांची नेमकी संख्या शाळा, शिक्षण मंडळ आणि स्थानिक नियमांनुसार वेगळी असू शकते.
या महिन्यात 15 ऑगस्टला स्वातंत्र्यदिन, 26 ऑगस्टला ईद-ए-मिलाद आणि 28 ऑगस्टला रक्षाबंधन आहे. याशिवाय शनिवार आणि रविवारच्या नियमित सुट्ट्याही आहेत. त्यामुळे महिन्याच्या उत्तरार्धात विद्यार्थ्यांना सलग सुट्ट्यांचा लाभ मिळण्याची शक्यता आहे.
ऑगस्टमधील शनिवार-रविवारच्या सुट्ट्यांमध्ये 1-2 ऑगस्ट, 8-9 ऑगस्ट, 15-16 ऑगस्ट, 22-23 ऑगस्ट आणि 29-30 ऑगस्ट या तारखांचा समावेश आहे. विशेष म्हणजे 28 ऑगस्टला रक्षाबंधनानंतर 29 आणि 30 ऑगस्टला शनिवार-रविवार असल्याने काही शाळांमध्ये सलग तीन दिवसांचा लाँग वीकेंड मिळू शकतो.
दरम्यान, प्रत्येक शाळेतील सुट्ट्यांचे वेळापत्रक एकसारखे असेलच असे नाही. काही शाळांमध्ये शनिवारची सुट्टी असते, तर काही ठिकाणी केवळ रविवारची सुट्टी असते. तसेच 15 ऑगस्टला अनेक शाळांमध्ये ध्वजारोहण आणि सांस्कृतिक कार्यक्रम आयोजित केले जात असल्याने विद्यार्थ्यांना शाळेत उपस्थित राहावे लागू शकते. त्यामुळे पालकांनी सोशल मीडियावर फिरणाऱ्या सुट्टीच्या याद्यांवर अवलंबून न राहता आपल्या शाळेचे अधिकृत सुट्टीचे कॅलेंडर तपासूनच नियोजन करावे.
