दारूच्या पैशांसाठी आईसोबत वाद, लोखंडी रॉडने हल्ला; हत्या लपवण्यासाठी मुलाने रचला बनाव, भोरमधील घटनेने खळबळ
पुणे : दारू पिण्यासाठी पैसे न दिल्याच्या रागातून मुलाने जन्मदात्या आईवर लोखंडी रॉडने हल्ला करून तिची हत्या केल्याची धक्कादायक घटना पुणे जिल्ह्यातील भोर तालुक्यात समोर आली आहे. हत्या केल्यानंतर मृतदेह घरातच ठेवून घराला बाहेरून कुलूप लावण्यात आले. त्यानंतर आरोपीने आई गावाला गेल्याचे सांगत शेजाऱ्यांची दिशाभूल करण्याचा प्रयत्न केला. वेळवंड खोऱ्यातील म्हाळवडी गावात घडलेल्या या प्रकारामुळे परिसरात संताप आणि हळहळ व्यक्त होत आहे.
मृत महिलेचे नाव बेबी काळू मालुसरे असून, त्यांचा मुलगा समीर काळू मालुसरे याला पोलिसांनी ताब्यात घेतले आहे. प्राथमिक माहितीनुसार, समीरने आईकडे दारू पिण्यासाठी पैशांची मागणी केली होती. मात्र, बेबी मालुसरे यांनी पैसे देण्यास नकार दिला. यावरून दोघांमध्ये वाद झाला आणि संतापलेल्या समीरने लोखंडी रॉडने आईच्या डोक्यावर आणि तोंडावर वार केले.
या हल्ल्यात बेबी मालुसरे गंभीर जखमी झाल्या. मात्र, त्यांचा मृत्यू झाला. आईचा मृत्यू झाल्यानंतर प्रकरण उघडकीस येऊ नये यासाठी समीरने मृतदेह घरातच ठेवला. त्यानंतर घराला बाहेरून कुलूप लावून तो तेथून निघून गेला. विशेष म्हणजे, शेजाऱ्यांनी आईबाबत विचारणा केल्यानंतर त्याने बेबी मालुसरे गावाला गेल्याचे सांगितले.
काही वेळाने समीर पुन्हा घराजवळ आला. त्यावेळी त्याने आई घरातच असल्याचे सांगितले. मात्र, या दरम्यान स्थानिकांना घटनेची माहिती मिळाल्याने संशय निर्माण झाला. नागरिकांनी तत्काळ भोर पोलिसांशी संपर्क साधला.
घटनेची माहिती मिळताच भोर पोलीस घटनास्थळी दाखल झाले. घराची पाहणी केल्यानंतर पोलिसांनी परिस्थितीची माहिती घेतली आणि समीर मालुसरे याला ताब्यात घेतले. घटनास्थळावरील परिस्थिती, उपलब्ध पुरावे आणि आरोपीच्या भूमिकेचा तपास सध्या पोलिसांकडून सुरू आहे.
दारूसाठी पैसे न दिल्याचा राग हेच हत्येमागील कारण आहे का, यासोबतच घटनेमागे अन्य काही कारण होते का, याचाही तपास केला जात आहे. हत्या नेमकी कधी झाली, हल्ल्यानंतर आरोपीने काय केले आणि मृतदेह घरात किती काळ ठेवला, याबाबतचा सविस्तर घटनाक्रम तपासातून स्पष्ट होणार आहे.
दारूच्या पैशांवरून सुरू झालेल्या वादाचा शेवट आईच्या हत्येत झाल्याने म्हाळवडीसह संपूर्ण भोर तालुक्यात या घटनेची चर्चा सुरू आहे. स्वतःच्या आईच्या हत्येप्रकरणी मुलाला ताब्यात घेतल्याने प्रकरण अधिक गंभीर बनले असून, पुढील तपास भोर पोलीस करत आहेत.
