अमित शाह यांचं पुण्यात मोठं भाषण! अण्णाभाऊ साठे, लोकमान्य टिळक ते संविधान… जाणून घ्या 5 मोठे मुद्दे
पुणे : केंद्रीय गृहमंत्री अमित शाह यांनी शुक्रवारी पुण्यातील प्रतिष्ठित टिळक पुरस्कार सोहळ्याला उपस्थिती लावली. राष्ट्रीय सुरक्षा सल्लागार अजित डोवाल यांना यंदाचा लोकमान्य टिळक राष्ट्रीय पुरस्कार प्रदान करण्यात आला. काँग्रेसच्या आंदोलनाच्या पार्श्वभूमीवर कार्यक्रमस्थळी कडेकोट पोलीस बंदोबस्त ठेवण्यात आला होता. शेकडो पोलिसांच्या सुरक्षेत हा सोहळा पार पडला.
भाषणाच्या सुरुवातीलाच अमित शाह यांनी लोकशाहीर अण्णाभाऊ साठे आणि लोकमान्य बाळ गंगाधर टिळक यांना जयंतीनिमित्त अभिवादन केले. अण्णाभाऊ साठे यांच्या सामाजिक कार्याचा गौरव करताना त्यांनी त्यांच्या साहित्याने आणि विचारांनी समाजाला नवी दिशा दिल्याचे सांगितले.
‘टिळकांनी सांस्कृतिक राष्ट्रवादाची पायाभरणी केली’
लोकमान्य टिळकांच्या कार्याचा गौरव करताना अमित शाह म्हणाले, टिळकांनी स्वराज्यासाठी संपूर्ण आयुष्य खर्च केले. त्यांनी स्वातंत्र्य चळवळीला जनआंदोलनाचे स्वरूप दिले. स्वातंत्र्याच्या लढ्याला राष्ट्रवादाची नवी दिशा दिली आणि सांस्कृतिक राष्ट्रवादाची संकल्पना रुजवली.
गणेशोत्सव आणि शिवजयंतीसारखे सार्वजनिक उत्सव सुरू करून समाजाला एकत्र आणण्याचे मोठे काम त्यांनी केले. देशाला कोणत्या मार्गाने पुढे जायचे, याची दिशा टिळकांनीच दाखवली. आज देश सांस्कृतिक राष्ट्रवादाच्या मार्गावर चालत असून आता या प्रवासाला कोणीही मागे खेचू शकणार नाही.
‘टिळक शिक्षक, पत्रकार आणि निर्भीड विचारवंत होते’
शाह म्हणाले, “टिळक केवळ स्वातंत्र्यसैनिक नव्हते, तर ते उत्कृष्ट शिक्षक, निर्भीड पत्रकार आणि महान चिंतक होते. त्यांनी भारताचा आत्मा आणि विवेक जनतेसमोर मांडण्याचे काम केले. त्यांच्या विचारांची ताकद आजही तितकीच प्रभावी आहे.”
‘तरुणांनी टिळकांचे गीतारहस्य वाचावे’
अमित शाह यांनी तरुणांना लोकमान्य टिळकांचे ‘गीतारहस्य’ वाचण्याचे आवाहन केले. ते म्हणाले, मला गुजरातीत भाषांतरित गीतारहस्य वाचायला मिळाले. प्रत्येक तरुणाने हा ग्रंथ वाचावा. तो वाचल्यानंतर आयुष्यात योग्य निर्णय घेण्याची प्रेरणा मिळते. भगवद्गीतेचे व्यावहारिक स्वरूप टिळकांनी या ग्रंथातून मांडले आहे.
‘इंग्रज केसरी आणि मराठाला घाबरत होते’
लोकमान्य टिळकांच्या पत्रकारितेचा उल्लेख करताना शाह म्हणाले, ब्रिटिश सरकार जर कोणत्या वर्तमानपत्रांना घाबरत असेल, तर ती ‘केसरी’ आणि ‘मराठा’ होती. टिळकांनी आपल्या लेखणीतून राष्ट्रभावना जागवली. राष्ट्राची चेतना जागृत केल्याशिवाय स्वातंत्र्याला अर्थ नाही, असा त्यांचा ठाम विश्वास होता.
‘आजच्या तरुणांसाठी टिळक प्रेरणास्थान’
शाह म्हणाले, महात्मा गांधींनीही टिळकांना ‘लोकमान्य’ म्हटले. त्यांचे विचार आणि लेखन कधीही कालबाह्य होणार नाही. आजच्या तरुणांनी टिळकांना वाचले पाहिजे. त्यांच्या विचारांतून प्रत्येक पिढीला प्रेरणा मिळत राहील.
अजित डोवाल यांना टिळक पुरस्कार
यंदाचा लोकमान्य टिळक राष्ट्रीय पुरस्कार राष्ट्रीय सुरक्षा सल्लागार अजित डोवाल यांना प्रदान करण्यात आला. यावेळी अमित शाह म्हणाले, समाजासाठी उल्लेखनीय कार्य करणाऱ्या व्यक्तींचा सन्मान हा समाजाच्या कृतज्ञतेचा भाग असतो. अजित डोवाल यांना हा पुरस्कार मिळाल्याने विविध क्षेत्रातील नागरिकांना प्रेरणा मिळेल. टिळक स्मारक ट्रस्टने त्यांची निवड करून योग्य व्यक्तीचा गौरव केला आहे.
कडेकोट पोलीस बंदोबस्त
दरम्यान, काँग्रेसच्या आंदोलनाच्या पार्श्वभूमीवर कार्यक्रमस्थळी मोठा पोलीस बंदोबस्त ठेवण्यात आला होता. शेकडो पोलिसांच्या उपस्थितीत संपूर्ण कार्यक्रम शांततेत आणि सुरळीत पार पडला.
