लग्नाला अवघे तीन महिने… प्रेयसीसाठी पत्नीचा काटा काढला; गुरुग्राममधील थरारक कटाचा पोलिसांनी केला पर्दाफाश

गुरुग्राम : हरियाणातील गुरुग्राम जिल्ह्यात नवविवाहित महिलेच्या हत्येप्रकरणी धक्कादायक माहिती समोर आली आहे. लग्नाला अवघे तीन महिने झाल्यानंतर पतीने आपल्या प्रेयसीसोबत संगनमत करून पत्नीची गोळ्या झाडून हत्या केल्याचा आरोप आहे. या प्रकरणी पोलिसांनी पती अंकित आणि त्याची प्रेयसी रजनी देवी यांना अटक केली असून न्यायालयाने दोघांना पोलीस कोठडी सुनावली आहे.

पोलिसांच्या प्राथमिक तपासानुसार, आरोपी अंकित आणि रजनी यांच्यात गेली तीन वर्षे प्रेमसंबंध होते. लग्नानंतरही हे संबंध कायम राहिल्याने पत्नी अडथळा ठरत असल्याचे दोघांना वाटत होते. त्यानंतर दोघांनी मिळून हत्येचा कट रचल्याचा आरोप आहे.

21 मे रोजी अंकित पत्नीला प्रेयसीच्या भाड्याच्या खोलीत घेऊन गेला. तेथे दोघांनी मिळून तिच्यावर गोळ्या झाडल्याचा संशय आहे. दुसऱ्या दिवशी तरुणीच्या आईने मुलगी बेपत्ता असल्याची तक्रार दाखल केली. तपासादरम्यान पोलिसांना खोलीत महिलेचा मृतदेह आढळून आला आणि हत्येचे गूढ उलगडू लागले.

तपासात आरोपींनी गुन्ह्यानंतर हरिद्वारमार्गे नेपाळमध्ये पलायन केल्याचे समोर आले. 30 जून रोजी भारतात परतल्यानंतर गुन्हे शाखेच्या पथकाने दोघांना अटक केली. हत्येसाठी वापरलेले शस्त्र उत्तर प्रदेशातून आधीच खरेदी केल्याचा संशय पोलिसांनी व्यक्त केला असून ते जप्त करण्याचे प्रयत्न सुरू आहेत.

या प्रकरणातील आर्थिक व्यवहार, शस्त्राची खरेदी आणि हत्येच्या कटामागील इतर बाबींचा पोलिसांकडून सखोल तपास सुरू आहे. गुरुग्राममधील या घटनेमुळे परिसरात मोठी खळबळ उडाली असून कौटुंबिक गुन्ह्यांबाबत पुन्हा एकदा गंभीर चर्चा सुरू झाली आहे.