मुंबईत पावसाचा कहर! चेंबूरमध्ये शाळेच्या बसवर कोसळलं महाकाय झाड; एका विद्यार्थ्याचा मृत्यू, 10 जण गंभीर जखमी

मुंबई : मुंबईत सुरू असलेल्या मुसळधार पावसाने मंगळवारी भीषण दुर्घटनेचं रूप धारण केलं. चेंबूरमधील 11 नंबर रोडवर शाळकरी विद्यार्थ्यांना घेऊन जाणाऱ्या बसवर अचानक महाकाय झाड कोसळल्याने एक विद्यार्थी दगावला, तर 10 विद्यार्थी गंभीर जखमी झाले. अपघातानंतर परिसरात एकच गोंधळ उडाला असून, पालकांनी घटनास्थळी धाव घेतल्याने वातावरण अत्यंत भावनिक झालं आहे. शहरात दिवसभर सुरू असलेल्या जोरदार पावसामुळे अनेक ठिकाणी झाडे कोसळण्याच्या घटना घडत असतानाच ही सर्वात मोठी दुर्घटना ठरली आहे.

प्राथमिक माहितीनुसार, ही बस टिळकनगर परिसरातील युनिव्हर्सल शाळेची असून विद्यार्थ्यांना घेऊन जात असताना हा अपघात झाला. अचानक झाड बसच्या छतावर कोसळल्याने बसचा वरचा भाग अक्षरशः चिरडला गेला. अपघातानंतर बसमध्ये अडकलेल्या विद्यार्थ्यांच्या आरडाओरडीनंतर स्थानिक नागरिक मदतीसाठी धावले. नागरिकांनी तातडीने काचा फोडून आणि दरवाजे उघडून विद्यार्थ्यांना बाहेर काढण्यास सुरुवात केली. काही मुलांना सुरक्षित बाहेर काढण्यात यश आले, मात्र एका विद्यार्थ्याला बाहेर काढण्यापूर्वीच त्याचा दुर्दैवी मृत्यू झाला.

घटनेची माहिती मिळताच बृहन्मुंबई महानगरपालिकेचे आपत्ती व्यवस्थापन पथक, अग्निशमन दल, पोलीस आणि रुग्णवाहिका काही मिनिटांत घटनास्थळी दाखल झाल्या. झाडाचा आकार मोठा असल्याने बचावकार्यात अडथळे निर्माण झाले. त्यामुळे प्रशासनाने जेसीबी मशीन आणि हायड्रॉलिक कटरच्या मदतीने झाडाच्या फांद्या हटवून बसमध्ये अडकलेल्या विद्यार्थ्यांना बाहेर काढण्याचे युद्धपातळीवर प्रयत्न केले. काही काळ परिसरात वाहतूकही पूर्णपणे विस्कळीत झाली होती.

दुर्घटनेत जखमी झालेल्या सर्व विद्यार्थ्यांना तातडीने जवळच्या रुग्णालयात दाखल करण्यात आले असून त्यांच्यावर डॉक्टरांचे विशेष पथक उपचार करत आहे. काही विद्यार्थ्यांची प्रकृती चिंताजनक असल्याची माहिती समोर आली आहे. दरम्यान, दुर्घटनेनंतर वरिष्ठ पोलीस अधिकारी आणि पालिका प्रशासनाने घटनास्थळाची पाहणी करत अपघाताची चौकशी सुरू केली आहे. झाडाची स्थिती, त्याची पूर्वतपासणी झाली होती का आणि देखभालीत हलगर्जीपणा झाला का, याचाही तपास केला जाणार आहे.

दरम्यान, हवामान विभागाने मुंबई, ठाणे आणि पालघरसाठी मुसळधार पावसाचा इशारा कायम ठेवला असून नागरिकांनी अनावश्यक प्रवास टाळावा, मोठ्या झाडांखाली किंवा धोकादायक ठिकाणी वाहन उभे करू नये, असे आवाहन प्रशासनाने केले आहे. या दुर्घटनेनंतर पावसाळ्यापूर्वी धोकादायक झाडांची छाटणी आणि सुरक्षिततेच्या उपाययोजनांवर पुन्हा एकदा प्रश्नचिन्ह उपस्थित झाले आहे.