३० जूननंतर गॅस सिलिंडर बंद होणार? अफवांमुळे ग्राहकांमध्ये संभ्रम; जाणून घ्या सरकारचे नवे नियम
नवी दिल्ली : देशभरात एलपीजी गॅस सिलिंडरधारकांमध्ये सध्या ३० जूननंतर सिलिंडर मिळणार नाहीत, अशी चर्चा जोर धरत आहे. मात्र या चर्चेमुळे निर्माण झालेला संभ्रम दूर करत केंद्र सरकारने गॅस पुरवठा पूर्णपणे बंद करण्याचा कोणताही निर्णय घेतलेला नसल्याचे स्पष्ट झाले आहे. उलट एलपीजी वितरण व्यवस्था अधिक पारदर्शक आणि शिस्तबद्ध करण्यासाठी काही महत्त्वाचे नियम लागू करण्यात आले असून त्याचा परिणाम निवडक ग्राहकांवर होणार आहे.
सरकारकडून ड्युप्लिकेट कनेक्शन रोखणे, अनुदानाचा लाभ पात्र लाभार्थ्यांपर्यंत पोहोचवणे आणि ज्या भागांमध्ये पाईपद्वारे नैसर्गिक वायू (पीएनजी) उपलब्ध आहे तेथे एलपीजीवरील अवलंबित्व कमी करणे, या उद्देशाने नवीन नियमांची अंमलबजावणी सुरू आहे. याच पार्श्वभूमीवर मार्च महिन्यात एक महत्त्वाचा निर्णय घेण्यात आला होता.
या निर्णयानुसार ज्या शहरांमध्ये किंवा परिसरांमध्ये पीएनजीची सुविधा उपलब्ध आहे, तेथील ग्राहकांनी निश्चित कालावधीत पीएनजी कनेक्शन स्वीकारणे अपेक्षित आहे. यासाठी ३० जून ही अंतिम मुदत निश्चित करण्यात आली असून ती आता अगदी जवळ आली आहे. संबंधित ग्राहकांनी वेळेत प्रक्रिया पूर्ण न केल्यास त्यांच्या एलपीजी कनेक्शनवर कारवाई होण्याची शक्यता व्यक्त केली जात आहे.
विशेष म्हणजे पीएनजी उपलब्ध असतानाही एलपीजीचा नियमित वापर सुरू ठेवणाऱ्या ग्राहकांकडे प्रशासनाचे लक्ष राहणार आहे. अशा प्रकरणांमध्ये गॅस पुरवठा बंद करणे किंवा कनेक्शन रद्द करण्यासारखे निर्णय घेतले जाऊ शकतात. त्यामुळे संबंधित ग्राहकांनी तातडीने आवश्यक प्रक्रिया पूर्ण करण्याचे आवाहन करण्यात आले आहे.
याशिवाय उज्ज्वला योजनेअंतर्गत लाभ घेणाऱ्या ग्राहकांसाठी ई-केवायसी प्रक्रिया पूर्ण करणेही महत्त्वाचे ठरले आहे. ३० जूनपर्यंत ई-केवायसी न केल्यास अनुदान मिळण्यात अडचणी येऊ शकतात. मात्र याचा अर्थ सिलिंडरचा पुरवठा पूर्णपणे बंद होईल असा नाही.
दरम्यान, सरकारच्या या नव्या नियमांमुळे सर्वसामान्य ग्राहकांनी अफवांवर विश्वास न ठेवता अधिकृत माहितीनुसार आवश्यक कार्यवाही करण्याचे आवाहन करण्यात आले आहे. ३० जूननंतर एलपीजी सिलिंडर बंद होणार नसले तरी नियमांचे पालन न करणाऱ्या ग्राहकांना त्याचे परिणाम भोगावे लागू शकतात.
