आमदार राहुल कुल यांच्या पाठपुराव्याला यश; १०० खाटांच्या विस्तारित दौंड उपजिल्हा रुग्णालयासाठी ४९ नवीन पदांना राज्य शासनाची मंजूरी…

दौंड : दौंड शहर आणि तालुक्यातील नागरिकांना दर्जेदार व अत्याधुनिक आरोग्य सेवा स्थानिक पातळीवर उपलब्ध व्हावी, यासाठी आमदार राहुल कुल यांनी केलेल्या सातत्यपूर्ण पाठपुराव्याला मोठे यश आले आहे. ५० खाटांवरून १०० खाटांमध्ये श्रेणीवर्धन झालेल्या दौंड उपजिल्हा रुग्णालयासाठी राज्य शासनाने ४९ नवीन नियमित पदांच्या निर्मितीला शासनाने अधिकृत मंजुरी दिली आहे.

याबाबतचा शासन निर्णय नुकताच सार्वजनिक आरोग्य विभागाने प्रसिद्ध केला आहे. यापूर्वी आमदार राहुल कुल यांच्याच विशेष प्रयत्नांमुळे या रुग्णालयाच्या भव्य विस्तारित इमारतीच्या बांधकामासाठी सुमारे ३३ कोटी ५२ लाख रुपयांचा भरीव निधी मंजूर करण्यात आला होता. या इमारतीचे बांधकाम आता अंतिम टप्प्यात आले असून, त्यातच आता ४९ कर्मचाऱ्यांचा नवीन आकृतीबंध मंजूर झाल्याने हे रुग्णालय लवकरच पूर्ण क्षमतेने रुग्णांच्या सेवेत रुजू होणार आहे.

रुग्णालयाचा कारभार चोख चालण्यासाठी आणि रुग्णांना तातडीने उपचार मिळण्यासाठी तज्ज्ञ डॉक्टर्स, नर्स आणि तांत्रिक कर्मचाऱ्यांची पदे मंजूर करण्यात आली आहेत. यामध्ये प्रामुख्याने: बधिरीकरण शास्त्रज्ञ (१), अस्थिव्यंग तज्ज्ञ (१), नेत्रशल्य चिकित्सक (१), दंतचिकित्सक (१), अपघात कक्ष वैद्यकीय अधिकारी (२) आणि वैद्यकीय अधिकारी वर्ग-३ (१), अधिपरिचारिका (स्टाफ नर्स – १५) आणि परिसेविका (३), प्रयोगशाळा तंत्रज्ञ व सहाय्यक (३), रक्तपेढी तंत्रज्ञ व परिचर (३), क्ष-किरण (X-Ray) तंत्रज्ञ (१), ई.सी.जी. तंत्रज्ञ (१), भौतिकोपचार तज्ज्ञ (१) आणि आहारतज्ज्ञ (१), अपघात विभाग सेवक (३), कक्षसेवक (५), शस्त्रक्रियागृह परिचर (१) आणि सफाईगार (१), प्रशासकीय अधिकारी (१), कार्यालयीन अधीक्षक (१), कनिष्ठ लिपिक (१) आणि बाह्यरुग्ण लिपिक (१) अशा प्रकारे एकूण ४९ पदे मंजूर करण्यात आलेली आहेत.

दौंड आणि परिसरातील ग्रामीण भागातील रुग्णांना गंभीर आजारांवर किंवा शस्त्रक्रियांसाठी यापूर्वी पुणे किंवा इतर मोठ्या शहरांमध्ये धाव घ्यावी लागत असे. यामुळे वेळेचा आणि पैशांचा मोठा अपव्यय होत होता. आमदार राहुल कुल यांनी हा प्रश्न गांभीर्याने घेत आधी रुग्णालयाची क्षमता ५० खाटांवरून १०० खाटांची करून घेतली, त्यासाठी सुसज्ज इमारत मंजूर करून आणली आणि आता हॉस्पिटल सुरळीत चालवण्यासाठी आवश्यक असणारा सर्व डॉक्टर व कर्मचाऱ्यांचा ताफाही मंजूर करून आणला आहे.

आमदार राहुल कुल यांच्या या यशस्वी पाठपुराव्याबद्दल दौंड तालुक्यातील नागरिकांमधून व रुग्णांमधून मोठे समाधान व्यक्त होत असून त्यांचे आभार मानले जात आहेत.

“दौंड तालुक्यातील शेवटच्या घटकापर्यंत उत्तम आरोग्य सुविधा पोहोचवणे हे आमचे ध्येय आहे. ३३ कोटी ५२ लाख रुपये खर्चून उभारली जाणारी सुसज्ज इमारती पूर्ण होत आली आहे, आणि आता ४९ नवीन पदे मंजूर झाल्यामुळे रुग्णांना तज्ज्ञ डॉक्टरांचे उपचार मिळतील. लवकरच या विस्तारित रुग्णालयाचे लोकार्पण करून ते जनतेच्या सेवेत समर्पित केले जाईल.” — आमदार राहुल कुल (दौंड विधानसभा मतदारसंघ)