५० कोटींच्या खंडणीसाठी गोळीबार, आता औषध वितरकालाही धमकी! पुण्यात बिष्णोई गँगचे जाळे विस्तारतेय?
पुणे : पुण्यातील फुरसुंगी परिसरात पोलाद व्यावसायिकाच्या कार्यालय आणि गोदामावर झालेल्या गोळीबाराच्या घटनेने निर्माण झालेली खळबळ अद्याप शांत झालेली नसतानाच, लॉरेन्स बिष्णोई गँगशी संबंधित आणखी एक धक्कादायक प्रकार समोर आला आहे. फुरसुंगी प्रकरणात ५० कोटी रुपयांच्या खंडणीसाठी गोळीबार झाल्याचा आरोप असताना, आता हडपसर-सासवड मार्गावरील वडकी परिसरातील एका औषध वितरकाला देखील खंडणीसाठी धमकावण्यात आल्याची माहिती समोर आली आहे. त्यामुळे पुण्यातील व्यावसायिकांना लक्ष्य करणाऱ्या संघटित गुन्हेगारी टोळ्यांच्या हालचालींबाबत चिंता व्यक्त केली जात आहे.
पोलिसांकडून मिळालेल्या माहितीनुसार, वडकी भागात औषध वितरणाचा व्यवसाय करणाऱ्या व्यापाऱ्याला समाजमाध्यमांद्वारे आणि अन्य संपर्क माध्यमांतून धमकीचे संदेश पाठवण्यात आले. या संदेशांमधून आर्थिक मागणी करण्यात आल्याची प्राथमिक माहिती समोर आली आहे. बुधवारी या घटनेची माहिती पोलिसांना मिळाल्यानंतर तातडीने तपास सुरू करण्यात आला. धमकी नेमकी कुठून आली, त्यामागे कोणते नेटवर्क कार्यरत आहे आणि त्याचा फुरसुंगीतील गोळीबाराशी काही संबंध आहे का, याचा शोध घेतला जात आहे.
या नव्या घडामोडीमुळे काही दिवसांपूर्वी उघडकीस आलेले फुरसुंगी गोळीबार प्रकरण पुन्हा चर्चेत आले आहे. फुरसुंगी भागातील एका पोलाद व्यावसायिकाच्या कार्यालयावर आणि गोदामावर अज्ञातांनी गोळीबार केला होता. तपासात या प्रकरणामागे लॉरेन्स बिष्णोई गँगचा हात असल्याचा संशय व्यक्त करण्यात आला. व्यावसायिकाकडे तब्बल ५० कोटी रुपयांची खंडणी मागण्यात आल्याचेही समोर आले. या प्रकरणी पोलिसांनी बिष्णोई गँगशी संबंधित आरजू बिष्णोई याच्याविरोधात गुन्हा दाखल केला आहे. मात्र तो अद्याप फरार असून त्याचा शोध घेण्यासाठी गुन्हे शाखेची विशेष पथके काम करत आहेत.
तपासादरम्यान आणखी एक महत्त्वाची बाब समोर आली आहे. गोळीबार करणाऱ्या संशयिताची ओळख पटली असून तो फुरसुंगी परिसरातील एका कंपनीत कामगार म्हणून कार्यरत होता. त्याने स्थानिक पातळीवर पोलाद व्यावसायिकाची आर्थिक माहिती, व्यवसायाचा विस्तार आणि हालचालींची माहिती गोळा करून ती गँगपर्यंत पोहोचवल्याचा संशय पोलिसांनी व्यक्त केला आहे. या माहितीच्या आधारेच खंडणीचा कट रचण्यात आल्याची शक्यता तपासली जात आहे.
विशेष म्हणजे, याआधी पिंपरी-चिंचवडमधील रावेत परिसरातील एका फर्निचर शोरूमवरही गोळीबार करून खंडणीची मागणी करण्यात आली होती. त्या प्रकरणात पोलिसांनी बिष्णोई गँगशी संबंधित काही आरोपींना अटक केली होती. त्यामुळे पुणे आणि परिसरातील व्यावसायिकांना लक्ष्य करण्यासाठी एकाच पद्धतीचा वापर केला जात आहे का, याचाही तपास सुरू आहे.
दरम्यान, पोलिसांकडून तांत्रिक तपासाला वेग देण्यात आला असून मोबाईल कॉल रेकॉर्ड, सोशल मीडिया अकाउंट्स, इंटरनेट कॉलिंग आणि डिजिटल पुरावे तपासले जात आहेत. सलग घडणाऱ्या घटनांमुळे पुण्यात बिष्णोई गँगचे जाळे अधिक मजबूत होत आहे का, असा प्रश्न उपस्थित होत असून या तपासातून आणखी मोठे खुलासे होण्याची शक्यता वर्तवली जात आहे.
