पुरंदर विमानतळाबाबत अफवा पसरवणारे ‘ते’ पत्र बनावट, शेतकऱ्यांकडे खोटी माहिती पसरवल्याप्रकरणी गुन्हा दाखल…
सासवड : पुरंदर विमानतळ प्रकल्पाबाबत सोशल मीडियावर व्हायरल करण्यात आलेले पत्र बनावट असल्याचे समोर आले आहे. या प्रकरणी प्रशासनाने कठोर भूमिका घेत सहा गावांतील शेतकऱ्यांच्या व्हॉट्सअॅप ग्रुपवर चुकीची माहिती पसरवणाऱ्यांविरोधात गुन्हा दाखल केला आहे.
मिळालेल्या माहितीनुसार, पुरंदर विमानतळासाठी जमीन संपादन आणि प्रकल्पाच्या कामासंदर्भात एक बनावट पत्र सोशल मीडियावर व्हायरल करण्यात आले होते. या पत्रामुळे परिसरातील शेतकरी आणि नागरिकांमध्ये संभ्रमाचे वातावरण निर्माण झाले होते. प्रशासनाने तपास केल्यानंतर हे पत्र अधिकृत नसल्याचे स्पष्ट झाले.
यानंतर संबंधित अधिकाऱ्यांनी पोलिसांत तक्रार दाखल केली. चुकीची आणि दिशाभूल करणारी माहिती पसरवून अफवा निर्माण करणाऱ्यांविरोधात कारवाई करण्यात आली आहे. विशेषतः सहा गावांतील शेतकरी ग्रुपमध्ये हे पत्र मोठ्या प्रमाणात शेअर करण्यात आल्याचे समोर आले आहे.
प्रशासनाने नागरिकांना आवाहन करत अधिकृत माहितीवरच विश्वास ठेवावा, असे सांगितले आहे. तसेच सोशल मीडियावर कोणतीही माहिती शेअर करण्यापूर्वी तिची खातरजमा करावी, अन्यथा कायदेशीर कारवाईला सामोरे जावे लागू शकते, असा इशाराही देण्यात आला आहे.
