राज्याच्या राजकारणात मोठी खळबळ! सुनेत्रा पवार यांचा उद्धव ठाकरे यांना फोन; बारामती पोटनिवडणुकीवर गुप्त चर्चा, नवा राजकीय ट्विस्ट?
मुंबई : राज्याच्या राजकारणात सध्या घडामोडींना वेग आला आहे. बारामती आणि राहुरी विधानसभा पोटनिवडणुका आता निर्णायक टप्प्यात पोहोचल्या आहेत. काँग्रेसने दोन्ही मतदारसंघांत उमेदवार देण्याचा निर्णय जाहीर केल्याने या निवडणुका बिनविरोध होण्याची शक्यता जवळपास संपुष्टात आली आहे.
महाविकास आघाडीत काँग्रेस हा प्रमुख घटक असला तरी उद्धव ठाकरे यांच्या शिवसेनेची आणि शरद पवार यांच्या राष्ट्रवादी काँग्रेसची यावर अद्याप अधिकृत भूमिका समोर आलेली नाही. त्यामुळे महाविकास आघाडी काँग्रेससोबत ठामपणे उभी राहणार की वेगळी भूमिका घेणार, याबाबत अनिश्चितता कायम आहे.
दरम्यान, उपमुख्यमंत्री सुनेत्रा पवार यांनी उद्धव ठाकरे यांच्याशी दूरध्वनीवर चर्चा केल्याची माहिती समोर आली असून, या संवादामुळे राजकीय हालचालींना आणखी वेग आला आहे.
दिवंगत अजित पवार यांच्या अपघाती निधनानंतर बारामती विधानसभा पोटनिवडणुकीची घोषणा झाली आहे. या पार्श्वभूमीवर उपमुख्यमंत्री सुनेत्रा पवार यांनी यापूर्वी राज्यसभेच्या खासदारकीचा राजीनामा देत उपमुख्यमंत्री पदाची शपथ घेतली असून, आता त्या बारामतीतून आमदारकीसाठी निवडणूक लढवण्याच्या तयारीत आहेत.
दरम्यान, सुनेत्रा पवार यांनी उद्धव ठाकरे यांना दूरध्वनी करून बारामती पोटनिवडणुकीत शिवसेनेचा पाठिंबा मागितल्याची माहिती समोर आली आहे. तसेच ही निवडणूक बिनविरोध व्हावी, यासाठीही त्यांनी चर्चा केल्याचे समजते.
मात्र काँग्रेसने या पोटनिवडणुकीत उमेदवार उभा करण्याचा निर्णय घेतल्याने निवडणूक बिनविरोध होणार नाही, हे स्पष्ट झाले आहे. त्यामुळे आता महाविकास आघाडीतील समीकरणे आणखी गुंतागुंतीची बनली आहेत.
या पार्श्वभूमीवर महाविकास आघाडीच्या आगामी बैठकीत उद्धव ठाकरे काँग्रेससोबत या विषयावर चर्चा करणार का, याकडे सर्वांचे लक्ष लागले आहे. दरम्यान, आघाडीतील इतर घटक पक्षांनी काँग्रेसच्या भूमिकेबाबत अद्याप कोणतीही अधिकृत प्रतिक्रिया दिलेली नाही, त्यामुळे राजकीय अनिश्चितता कायम आहे.
बारामती आणि राहुरी विधानसभा पोटनिवडणुकीसाठी काँग्रेसला दिल्लीहून हिरवा कंदिल मिळाल्याची माहिती समोर येत आहे. या पार्श्वभूमीवर बारामतीसाठी काँग्रेसकडे 6 इच्छुकांनी उमेदवारी मागितली असून, राहुरी मतदारसंघासाठी 4 जणांनी तिकीटासाठी अर्ज केला आहे.
या सर्व इच्छुकांच्या ऑनलाईन मुलाखतीदेखील पूर्ण झाल्या आहेत. आता काँग्रेसकडून मित्रपक्षांशी—उद्धव ठाकरे यांच्या शिवसेना आणि शरद पवार यांच्या राष्ट्रवादी काँग्रेस—यांच्यासोबत चर्चा करून अंतिम निर्णय घेतला जाणार आहे.
दरम्यान, राष्ट्रवादी काँग्रेसने निवडणूक लढवली नाही तर काँग्रेस पूर्ण ताकदीने मैदानात उतरण्यास तयार असल्याचे प्रदेशाध्यक्ष हर्षवर्धन सपकाळ यांनी स्पष्ट केले आहे. तसेच, काँग्रेसला राष्ट्रीय समाज पक्ष, वंचित बहुजन आघाडी यांसह इतर पक्षांचा पाठिंबा मिळत असल्याने बारामती आणि राहुरीतील पोटनिवडणुकीत चुरशीची लढत होण्याची शक्यता वाढली आहे.
