रणवीर सिंहचा धुरंधर २ वादाच्या भोवऱ्यात! ‘या’ राज्यात बंदी घालण्याची मागणी, नेमकं प्रकरण काय?
मुंबई : रणवीर सिंहचा बहुचर्चित चित्रपट ‘धुरंधर: द रिव्हेंज’ सध्या बॉक्स ऑफिसवर तुफान कमाई करत असून देशासह परदेशातही प्रेक्षकांकडून मोठा प्रतिसाद मिळवत आहे. अॅक्शन, ड्रामा आणि दमदार अभिनयामुळे हा चित्रपट चर्चेचा केंद्रबिंदू ठरला आहे.
मात्र चित्रपटाच्या यशासोबतच वादाचं सावटही गडद होताना दिसत आहे. विशेषतः एका राज्यात या चित्रपटावर बंदी घालण्याची मागणी करण्यात आल्याने नव्या वादाला तोंड फुटलं आहे. काही संघटनांनी चित्रपटातील कथानक आणि काही दृश्यांवर आक्षेप घेतला असल्याची माहिती समोर येत आहे.
रणवीर सिंह अभिनित ‘धुरंधर: द रिव्हेंज’ हा बहुचर्चित चित्रपट 19 मार्च रोजी जगभरातील चित्रपटगृहांत प्रदर्शित झाला. आदित्य धर दिग्दर्शित या चित्रपटाने प्रदर्शनानंतर अवघ्या काही दिवसांतच बॉक्स ऑफिसवर दमदार कामगिरी नोंदवली आहे.
भारतामध्ये केवळ पाच दिवसांतच या चित्रपटाने 500 कोटी रुपयांचा टप्पा पार केला असून, जागतिक स्तरावरही कमाई 800 कोटी रुपयांहून अधिक झाली आहे. या भव्य यशामुळे सध्या थिएटरपासून सोशल मीडियापर्यंत ‘धुरंधर: द रिव्हेंज’ची जोरदार चर्चा रंगताना दिसत आहे.
मात्र या चित्रपटावर टीकेचे सूरही उमटू लागले आहेत. काहीजणांनी या चित्रपटात राजकीय संदेश असल्याचा आरोप करत वाद निर्माण केला आहे. विशेषतः तमिळनाडूमध्ये या चित्रपटाच्या प्रदर्शनावर आक्षेप घेतला गेला आहे.
या प्रकरणी मद्रास उच्च न्यायालयमध्ये याचिका दाखल करण्यात आली असून चित्रपटावर बंदी घालण्याची मागणी करण्यात आली आहे. त्यामुळे चित्रपटाच्या यशासोबतच वादाचीही चर्चा अधिक रंगताना दिसत आहे.
मिळालेल्या माहितीनुसार तमिळनाडू विधानसभा निवडणुकीच्या पार्श्वभूमीवर हा वाद न्यायालयापर्यंत पोहोचला आहे. शीला नावाच्या एका वकिलाने मद्रास उच्च न्यायालयात याचिका दाखल करत, या चित्रपटात राजकीय संदर्भ असल्याचा दावा केला आहे.
त्यांच्या मते, चित्रपटातील कथानक मतदारांच्या भावना प्रभावित करू शकते आणि निवडणुकीच्या वातावरणावरही परिणाम होण्याची शक्यता आहे. त्यामुळे या प्रकरणामुळे चित्रपटासोबतच निवडणूक प्रक्रियेबाबतही चर्चा अधिक तीव्र होताना दिसत आहे.
याचिकेत असेही नमूद करण्यात आले आहे की चित्रपटातील काही प्रसंग आणि संवेदनशील कथानक राजकीय दृष्टिकोनातून मतदारांवर प्रभाव टाकू शकतात. त्यामुळे निवडणुकीपूर्वी तमिळनाडूमध्ये या चित्रपटाचे प्रदर्शन रोखण्यात यावे, अशी मागणी करण्यात आली आहे.
दरम्यान, मद्रास उच्च न्यायालयाने यासंदर्भात औपचारिक याचिका दाखल करण्याचे निर्देश दिले असून त्यानंतरच या प्रकरणावर सुनावणी होणार आहे. या वादाच्या पार्श्वभूमीवर चित्रपटाचे दिग्दर्शक किंवा निर्माते यांची अद्याप अधिकृत प्रतिक्रिया समोर आलेली नसून, पुढील सुनावणीकडे सर्वांचे लक्ष लागले आहे.
