हॉटेलमधील जेवण महागणार? गॅस दरवाढीचा तडाखा; सर्वसामान्यांच्या खिशाला बसणार चटका…
मुंबई : मध्य पूर्वेतील संघर्षाचे पडसाद आता भारतात उमटू लागले असून महाराष्ट्रात घरगुती व व्यावसायिक गॅसच्या उपलब्धतेवर त्याचा थेट परिणाम जाणवत आहे. पुरवठा साखळी विस्कळीत झाल्याने बाजारात तुटवडा निर्माण झाला आहे, ज्याचा फटका सामान्य नागरिकांपासून व्यावसायिकांपर्यंत सर्वांनाच बसत आहे. या पार्श्वभूमीवर परिस्थिती नियंत्रणात आणण्यासाठी सरकारने महत्त्वाचे पाऊल उचलले आहे.
सध्या इराण आणि इस्रायल यांच्यात सुरू असलेल्या संघर्षामुळे जागतिक ऊर्जा क्षेत्रात मोठी अस्थिरता निर्माण झाली आहे. या तणावाच्या पार्श्वभूमीवर इराणने होर्मुझ सामुद्रधुनी बंद केल्याने तेल आणि गॅसच्या आंतरराष्ट्रीय वाहतुकीवर गंभीर परिणाम झाला आहे. जगातील इंधन वाहतुकीसाठी अत्यंत महत्त्वाचा मानला जाणारा हा मार्ग बंद झाल्यामुळे अनेक देशांमध्ये इंधन पुरवठ्यावर ताण निर्माण होत असून त्याचे परिणाम आता जागतिक बाजारात स्पष्टपणे दिसू लागले आहेत.
या घडामोडींचा परिणाम भारतातील एलपीजी आणि नैसर्गिक वायूच्या पुरवठ्यावरही स्पष्टपणे जाणवत आहे. महाराष्ट्रात घरगुती गॅस सिलिंडर मिळवण्यासाठी अनेक ठिकाणी नागरिकांना दीर्घ प्रतीक्षा करावी लागत असून काही भागांत गॅससाठी रांगा लागल्याचे चित्र समोर येत आहे.
दरम्यान, तुटवडा वाढत चालल्याने काळाबाजाराच्या तक्रारीही पुढे येत आहेत. व्यावसायिक क्षेत्रात परिस्थिती अधिकच गंभीर बनली असून हॉटेल्स, ढाबे, उपहारगृहे आणि कॅन्टीन चालवणाऱ्या व्यावसायिकांना गॅसअभावी मोठ्या अडचणींचा सामना करावा लागत आहे.
परिस्थितीची गंभीरता ओळखून महाराष्ट्र सरकार यांनी महत्त्वाचा निर्णय जाहीर केला आहे. राज्याचे अन्न व नागरी पुरवठा मंत्री छगन भुजबळ यांनी दिलेल्या माहितीनुसार, केंद्र सरकार यांच्या निर्देशानुसार व्यावसायिक क्षेत्रासाठी एलपीजी पुरवठ्यात 20 टक्क्यांची वाढ करण्यात येणार आहे.
या निर्णयामुळे हॉटेल्स, उपहारगृहे, ढाबे, औद्योगिक कॅन्टीन, अन्न प्रक्रिया उद्योग तसेच शासकीय अनुदानित कॅन्टीनना मोठा दिलासा मिळणार असून गॅस तुटवड्याचा ताण काही प्रमाणात कमी होण्याची शक्यता आहे.
